Shoddo 18 - Kafa Linguistics Project

Wudoon Bi Danehooba Daawitichi Shoddo

Shoddechinaꞌochi ukkiroyich, Doono Yeeri Saaꞌooli kishoochee, wotta bi etteenaꞌo bulli kishoochee biin bi wodiihooba, Doono Yeeri guuno Daawiti Doono Yeerich shoddeti shoddo

¹ Doono Yeeri ta hakkoocho, neen shunnehoye.

² Doono Yeeri ta deebe xaqqo, ta mishigo, taan wodiyecho, ta Nuggishoo, shoobbii taan wodiibeeti deebe xaqqo, gaachoochoommon taan qeriibeeto, giidechi wodiyecho, bi shoobooch giyiree ta wodemmi, ta deeboone.

³ Galleto biich giddi bede Doono Yeer waan ta cookaa, biyoo ta etteenaꞌo kishoochee taan wodii beetone.

⁴ Qitoo woderoochoommon ta toommooch caaceehe; aalliyechi ooge aacochoommon taan qooxxa iye.

⁵ Siꞌoolee woderoo ta qettoona yechiye; qitoo olloochoommon taan yecha iye.

⁶ Ta xuuxehooba, Doono Yeerin ceeggehoye; ta Nuggishoo taan bi gaachemmoyich ceeggehoye. Biyoo bi yaafee kexooch beechii, ta qaaroon waayehe; ta cookoo bi waamooch shaggiye.

⁷ Showoo qewehe; shuuriinoo iye; guudi koteenaꞌo shuuriyeete; qeweenoo iyeete; ebiyoo Yeeri kaaretoyichiye.

⁸ Bi muddoochee cufoo kechiye; bi kookkoochee michii aalliibeeti qaaqqoonaa geecciibeeti qaaqqee bunoona kechiye.

⁹ Shimaayoon qechiꞌi dugilla kindiye; bi baatee dechiich mandereti qubo beetone.

¹⁰ Kiruubee toommooch tuneꞌi yoobbiye; yongoochi qoshoona tuneꞌi yoobbiye.

¹¹ Bi guudoon manderoo qeremmoyich tuniihe; aacona ceenniti, dunne qubo bi guudoona tunehe.

¹² Bi aafooch beeti bekkoochee, baderoonaa qaaqqee bunoona quboon gaakkiꞌi aaxxee kechiye.

¹³ Doono Yeeri shimaayoochaa gigehe; Beshoo Yeeri bi qaaroon waayiihe.

¹⁴ Bi shangeenaꞌon awureꞌi bi etteenaꞌon shacciye; phaqqoo phaqqemmoyich tuniiꞌi, boonoshin shaccii aalliihe.

¹⁵ Doono Yeerichi noggoochee, bi muddoochee bi kachiti kaaree cufoochee tiyitona, baharee dechi ducho bekkehe; showee tuugeenaꞌoo shokkaachoon echeheete.

¹⁶ Dambee bi kishoon deejjiꞌi, taan yechiye; aachi gejjoochee taan kichiye.

¹⁷ Giidechinaꞌo tuneti ta etteenaꞌo kishoochee, taan shixxii beetinaꞌo kishoocheenoo taan wodiihe; ebiyoo tayee beshe giidechinaꞌo boonoshi tunetoyichiye.

¹⁸ Boonoshiyoo ta duꞌehooba ta toommooch tiyiheete; tunebaani Doono Yeeri taach dego tunehe.

¹⁹ Biyoo gamini xaaꞌooch taan daammiye; taanna bi emiritoyich, taan wodiihe.

²⁰ Ta cadiqittinoochee tiyitona, Doono Yeeri taach deꞌoon deehe; ta kishee xallittinoochee tiyitona, taach wochiꞌi qocciye.

²¹ Ebiyoo Doono Yeerichi gommon ta dabbitoyichiye; gondoon shuunoona Yeer waanee gubb wotteyaano ta tunetoyichiye.

²² Bi sheeroo bullin ceechito taane; bi qociyoocheenoo gubb wotteyaano taane.

²³ Bi aafooch oonaallo taane; gondoon shuunoochee ta qelloon quyeto taane.

²⁴ Ebich Doono Yeeri ta cadiqittinoochee tiyitona, bi aafooch taach beeti ta kishee xalloochee tiyitona, taach wochiꞌi qocciye.

²⁵ Doono Yeero, neech gibeneetinaꞌoyich gibeneeto neene; oonneyaaneenaꞌoyich ceeni gaaweto neene.

²⁶ Mulli xalleenaꞌoyich gaaweto neene; xummeenaꞌoyich marecho neene.

²⁷ Xukketinaꞌon wodiihine; tunebaani geecechinaꞌon giishiihine.

²⁸ Doono Yeero, ne, ta ceechoon aaxxiihine; ta Nuggishoo ta manderoon bekkooch wochiye.

²⁹ Taach ne immaabeeti giidoona ta etteenaꞌon yiikkeho; ta Nuggishoochi gaachoona katemee xaqqee uxeroon cappheho.

³⁰ Yeerichi gommo muricaalloone; Doono Yeeri gettiti mooyo gibeneetone; bi shoobooch giyitinaꞌon gaachoochoommon qerii beetone.

³¹ Doono Yeeriyee besh, Nuggishoo konine? No Nuggishoyee besh, Xaqqee Inderoo konine?

³² Taach giidoon immiibeeto, ta gommonoo taach kaachiibeeto, Yeerine.

³³ Biyoo ta baatoon doollee baatoochoommon kupphiihe; geppee toommooch keqqaalloon ta neexemmoyich tuniihe.

³⁴ Ta kishoo aabichi bi koyemmo gaata dojjiye; ebich ta mochoo gooshoochee shuuneeti maꞌoon yeephon hakkitone.

³⁵ Taan wodiyemmi ne gaachoon taach immehine; ne qanne kishoo taan deggiye; ne gaachoo taan oogiihe.

³⁶ Ta shaaddemmi boochoon taach gamichihine; ta baatoo giinaanoone.

³⁷ Ta etteenaꞌon yookkaa dabbaꞌa yechoye; boonoshi aallemmi wottoon gubb wotteyaano taane.

³⁸ Boonoshin yexxaa dichiyoye; boonoshiyoo aroochee timon hakkaaneenaꞌone; ta aafooch dihiꞌi echeheete.

³⁹ Ginoochaa giidechon ta tunemmoyich, taan kupphiihine; ta toommooch tiyitinaꞌo ta baatooch goyinnemmoyich tuniihine.

⁴⁰ Ta etteenaꞌo boonoshi hilla wotteree woccemmoyich tuniihine; taan shixxii beetinaꞌon aalliihoye.

⁴¹ Boonoshin gaachemmon qaawiꞌi cookiyeete; tunebaani boonoshin wodiito aalloone; Doono Yeer waan cookiyeete; tunebaani bi, boonoshi cookoon waayeyaanoone.

⁴² Boonoshin yiikkaꞌa yongo daammiibeeti quttoon tuniihoye; gommooch beeti dengoochoommon, boonoshin kotehoye.

⁴³ Deꞌa getaani macceenaꞌo kishoochee taan wodiihine; aageteenaꞌo toommooch taan iraashiihine; boonoshin ta ariyaani asheenaꞌo taach maddeheete.

⁴⁴ Ashi showee asheenaꞌo waaꞌi, ta aafooch yittiyeete; ta gettaahaa, bekkech ta getoon waayeheete.

⁴⁵ Boonoshi mullo qitiye; boonoshi aasheti xaaꞌoochee qeweebee ta waan waaheete.

⁴⁶ Doono Yeeri beeyechone; taach deebe xaqqo tuneto galleteebe! Taan wodiibeeti ta Nuggishoo oogebe!

⁴⁷ Yeeri ta etteenaꞌo toommooch nichoon kichii beetone; biyoo macceenaꞌo taach hajjeyemmoyich tunii beetone.

⁴⁸ Bi ta etteenaꞌo kishoochee taan wodii beetone. Doono Yeero, ta etteenaꞌo toommooch taan oogiihine; xuꞌechinaꞌo kishoochee taan wodiihine.

⁴⁹ Ebich neen aageteenaꞌo daggoochaa galletehoye; ne shigoyich galletee shoddoon shoddehoye.

⁵⁰ Doono Yeeri bi taatiiti taatoyich ooge wudoon immii beetone; bi huuttitoyich bi shoodoon bekkii beetone; ebinoo Daawitinaa bi shiijjereenaꞌonoyich bulli yemeenoon tuniihe.