Shoddo 17 - Kafa Linguistics ProjectDeꞌe Ashi Corooto Daawitichi corooto 1 Doono Yeero, kaamittinoona giddeti ta corootoon waayebe; ta cookoonoo ellebe; marechi noonoochee keyaani ta corootoon ellebe. 2 Ta xallittino ne waanee wobe; ne aafo kaame nalloon ciine. 3 Ta mulloon beeggehine; xumoon ta waan waahine; taanoo phiree beeggehine; ta waanee gondoon daneyaano neene; ta heciyoo muricaanoone. 4 Ne getoyich deꞌa ta itoyich, xuꞌechinaꞌochi shuunoon, boonoshi gommonoo dabbaano taane. 5 Ta shaaddo ne gommooch manjitone; ta baatoo giinaanoone. 6 Yeero, ta qolloon waayemmo ne tunetoyich, ne waan corootiyoye; ne waamon ta waan gaꞌiiree ta qolloon waayebe. 7 Etto waanee ne shoobooch giyitinaꞌon, ne qanne mochoona wodiyechocho, ne shoodoon worganikkiti gommona bekkiibe. 8 Ne aafee aachoochoommon taan quyebe; ne qoshee yiiroochoo taan aachibe. 9 Taan duꞌiibeeti gondeenaꞌo waanee, taan wuxiya giichiti ta etteenaꞌo waanee, taan quyebe. 10 Boonoshi mulloon muumiitinaꞌone; boonoshi noonoo geecoona yibbaatehe. 11 Taan yookkii yechiꞌi giichiyeete; showooch ceqqoyich taan ciinniyeete. 12 Boonoshiyoo yeshi yangixxa dakiti daaheroomminaꞌone; ottii quyeebeeti more daaheroomminaꞌone. 13 Doono Yeero, tiyi boonoshina koyeree, koyi wochibe; gondeenaꞌo kishoochee ne goraadoona ta kasheen wodiibe. 14 Doono Yeero, asheenaꞌo waanee, boonoshi ixee qoodoo showee toommeexi kasho baach tuneti asheenaꞌo kishoochee, ne kishoona taan wodiibe. Ne shunnaa beetinaꞌo michemmoyich tuniibe; boonoshi bushiisheenaꞌoyich, boonoshi bushaa bushiisheenaꞌoyichoo wodde maayo beeyemmoyich tuniibe. 15 Tunebaani ta, cadiqittinoona ne aafoon beeggemmo taane; tiyi qaalliree, ne oogee yiiroon beegi michemmo taane. |
SIM International, 2020.