Shoddo 16 - Kafa Linguistics Project

Doono Yeerina Deebeyoyich Corooteeti Corooto

Daawitichi shoddo

¹ Yeero, ne shoobooch ta giyetoyich, taan quyebe.

² Doono Yeerich ishichiyo, “Ne ta Doono neene; ne waanee besh deꞌe mooyo taach daneyaanoone” iyo.

³ Showee toommeexi yaafeenaꞌo moogeetinaꞌone; tawoo boonoshina emiraabeeto taane.

⁴ Bare nuggishoyich goyinnee beetinaꞌo beshe iritooch dihemminaꞌone; ta boonoshich damee deejjoon deejjaache; boonoshi shigoonoo ta noonoona ceegaache.

⁵ Doono Yeero, ta qoodee iristo, ta xoofoo neene; ta ixoo ne kishoochiye.

⁶ Qeellee woderoona taach yexxeto gaawe xaaꞌoone; emirikkiti iristoon daneto taane.

⁷ Taan ciicciti Doono Yeerin galletehoye; xumoonona ta mullo taan dojjii beetone.

⁸ Bulli aaboon Doono Yeerin ta aafooch shiichiihoye; ta qanne badd bi beetoyich taan shuurikkemmo aalloone.

⁹ Ebina ta mullo emiriye; ta kashoo oogeton emiriye; ta meeno keqqaalloon kasheꞌi beehe.

¹⁰ Taan maash qayaachemmo neene; gibeneeti ne guuno taan oppooch daachiyaachemmo neene.

¹¹ Kashee gommon taach bekkiyemmo neene; ne aafooch ceeni emiroo, ne qannoochoo bulli yemeenee emiroo beetone.