Shoddo 148 - Kafa Linguistics ProjectDoono Yeerin Galletoyich Halleenaꞌo Ceekko 1 Haleluya! Shimaayoochaa Doono Yeerin galletebote; dambaa biin galletebote. 2 Bi maraakeenaꞌote, ittoshi bulli biin galletebote; shimaajji ginee naayinaꞌote, biin galletebote. 3 Aabeenaa ageneenote, biin galletebote; aaxxeebeeti xojjeneenaꞌote, biin galletebote. 4 Shimaayoyee dambee shimaayeenaꞌote, biin galletebote; gumoyee dambee aacinaꞌote, biin galletebote. 5 Bi getoona boonoshi halleetoyich, Doono Yeerichi shigoon galletebeete. 6 Boonoshin bulli yemeenooch manjii neechitone; shaddeyaani sheeroona boonoshin qociitone. 7 Bahareexi halleenaꞌonaa ceeni aacinaꞌonote, ittoshi bulli showoochaa Doono Yeerin galletebote. 8 Qaaqqoonaa baderoona, kechoonaa quboona, bi getoon ceechiibeeti giidechi yongoo, 9 guudinaꞌonaa geppeenaꞌo bullina, aafeebeeti mixinaꞌonaa yigeenaꞌo bullina, 10 cooxinaꞌonaa gijjoo bullina, yuummere halleenaꞌonaa qoshoona yoobbiibeetinaꞌo bullina, Doono Yeerin galletebeete. 11 Showee taateenaꞌonaa macceenaꞌo bullina, iraasheenaꞌonaa showee ukkireenaꞌona, Doono Yeerin galletebeete. 12 Gurimaasheenaꞌonaa gidiideenaꞌona, geeneenaꞌonaa bushiisheenaꞌona, Doono Yeerin galletebeete. 13 Bi shigo baach damba oogeto bi tunetoyich, bi oogo showoonaa shimaayoonoyee damboo bi tunetoyich, Doono Yeerin galletebeete. 14 Bi shuni asheenaꞌo tuneti Israꞌeeleenaꞌon, bi yaafeenaꞌon oogiyoyich, bi macceenaꞌoyich qaroon kaaccitone. Haleluya! |
SIM International, 2020.