Shoddo 147 - Kafa Linguistics Project

Bullin Hakkiti Nuggishoyich Giddemmi Galleto

¹ Haleluya! No Nuggishoyich galletee shoddoon shoddo gaawetone; biin galleto emirikkii beetonaa qaawiitonane.

² Doono Yeeri Yerusaalemin wochii shuunehe; kecceti Israꞌeeleenaꞌon wochii deebiye.

³ Boonoshi mullo tiishetinaꞌon goggiihe; boonoshi mayon kaappii wodiihe.

⁴ Biyoo xojjeneenaꞌochi haddoon ariihe; boonoshi ikkikkoon boonoshi shigoona ceeggiye.

⁵ No Doono oogoone; oogeti giidechone; bi ariyoyich daaro aalloone.

⁶ Boonoshi qelloon giishiitinaꞌon Doono Yeeri damba tiijjiye; tunebaani gondeenaꞌon showooch dichiye.

⁷ Doono Yeerich galletee shoddoon shoddebote; no Nuggishoyich ooge ximboon yexote.

⁸ Quboona shimaayoon qeriye; showeyichoo amiyon qanniihe; geppeenaꞌooch mocoon colliihe.

⁹ Maayoon gijjeenaꞌoyich, caawaacaaweebeeti kurechee bushiishoyichoo, immiye.

¹⁰ Haresheenaꞌochi kupphittino, ginee naayinaꞌochi giidoo, biin emirikkaache.

¹¹ Tunebaani Doono Yeeri emiriibeeto, biin shattii beetinaꞌona, bi shoodoon gibenee beetinaꞌonane.

¹² Yerusaaleme, Doono Yeerin galletebe; Tsiyoone, ne Nuggishoon galletebe.

¹³ Aroo ne kelleenaꞌochi tuggoon kupphiihe; ne daggooch beeti ne bushiisheenaꞌon diiriye.

¹⁴ Ne showee daaroon diggiihe; gaawe teepphoona neen michiihe.

¹⁵ Bi getoon showooch deejjiye; bi qaaroo woccii shaggiye.

¹⁶ Kechoon huuttoochoommon yaggiye; doshoonoo tulloochoommon shakkiye.

¹⁷ Bi, baderoon xaqqoochoommon kindiihe; bi deejjiibeeti aqqee googgee aafooch neexoon hakkemmo konine?

¹⁸ Bi qaaroon bi deejjaa baderoo muujjiye; bi yongoon bi yongiitaa aaco wocciye.

¹⁹ Bi qaaroon Yaaqobich, bi qociyoonaa getoonon Israꞌeelich, immiye.

²⁰ Ebin bare aagetoyich tuniyaanoone; boonoshiyoo bi sheeroon ariyaacheete. Haleluya!