Shoddo 145 - Kafa Linguistics Project

Galletee Shoddo

Daawitichi galletee shoddo

¹ Ta Nuggishoo ta Taatoocho, neen oogiihoye; ne shigoon bulli yemeenoon galletehoye.

² Bulli aaboon neen galletemmo taane; bulli yemeenoon ne shigoon oogiyemmo taane.

³ Doono Yeeri oogoone; biin oogichii galleto tatoone; bi oogittino shalligoyee damboone.

⁴ Ikke shiijjeroo ne shuunoon bare shiijjeroyich gettemmone; giidechi ne shuunoon awaajjemmone.

⁵ Ne oogoonaa ne oogee yiiroonon yibbaatemminaꞌone; tawoo worganeeti ne shuunoon kichi kindii gabemmo taane.

⁶ Worganeeti ne shuunee giidoo awaajjeyemmone; tawoo oogoo ne tunoon awaajjemmo taane.

⁷ Beshaa beshe ne deꞌittino getteyemmone; ne cadiqitinoyichoo ooge qaaroona shoddeyemmone.

⁸ Doono Yeeri ariqqechonaa maarechonane; kaaroyich nibbechone; wodde shoodechone.

⁹ Doono Yeeri bullich deꞌoone; bi hallito bullich ariqqechone.

¹⁰ Doono Yeero, ne hallito bulli neen galletehe; yaafeeti ne asheenaꞌo bulli neen diiriyeete.

¹¹ Ne taateechi oogoon yibbaatemminaꞌone; ne giideechon gettemminaꞌone.

¹² Ebina giidechi ne shuunoon, ne taateechi oogee yiiroon arichiyemminaꞌone.

¹³ Ne taatittino bulli aabee taatittinoone; bushaa bushooch beddaahaa hajjemmo neene. Doono Yeeri bi qaaro bullina gibeneetone; bi shuunoo bullina shoodechone.

¹⁴ Doono Yeeri, dihitinaꞌon tiijjemmone; goobetinaꞌonoo kaachemmone.

¹⁵ Bullichi aafoo ne waan ciinniye; newoo goori gooroona maayoon boonoshich immehine.

¹⁶ Ne kishoon yaggihine; kashechi halloo bullichi qaatoon ceechihine.

¹⁷ Doono Yeeri bi gommo bullina cadiqoone; bi shuunoo bullina deꞌoone.

¹⁸ Doono Yeeri, biin ceeggiibeeto bullich, iberoona biin ceeggii beetoyich, katinoone.

¹⁹ Biin shattii beetinaꞌochi qaatoon ceechemmone; boonoshi cookoon waayeꞌi boonoshin wodiihe.

²⁰ Doono Yeeri biin shunniibeeto bullin quyehe; tunebaani gondeenaꞌo bullin aalliihe.

²¹ Ta, Doono Yeerin bulli aabooch galletemmo taane; bi hallito bulli yaafe bi shigoon bulli yemeenoon galletebe.