Shoddo 144 - Kafa Linguistics Project

Wudoo Danetoyich Galleto

Daawitichi shoddo

¹ Ginoon ta koyemmoyich ta kishoon, koyoon ta koyemmoyich ta mochoon dojjiti, ta Deebe Xaqqo Doono Yeeri galleteebe!

² Taach shoodecho, ta mishigo, ta deeboonaa taan wodiyechonane. Ta gaachoo, shoobbii taan wodiyecho, macceenaꞌon taach hajjiibeetoo biine.

³ Doono Yeero, ebi shaahoon biin ne aaxxiyemmoyich asho amoone? Biin ne gabemmoyichoo ashi bushoo amoone?

⁴ Asho hiinnoommone; bi yemeeno besheebeeti yiirittoommone.

⁵ Doono Yeero, shimaayoon gaahiree kindibe; ne yeshaa, guudinaꞌo cufibeete.

⁶ Xeeyoon kindiiree etteenaꞌon shace; ne shangeenaꞌon awureree boonoshin daafiibe.

⁷ Ne kishoon dambee deejjibe; giidechi aacoochee geechi kichiree taan wodiibe; dallaaweenaꞌo kishoochee taan wodiibe.

⁸ Boonoshi noonoo kootoon yibbaatehe; qanne kishoon tiijjiꞌi boonoshi wogeebeeto kootooniye.

⁹ Yeero, andire shoddoon neech shoddemmo taane; aashire maqqechi ooge ximboona neech shoddemmo taane.

¹⁰ Ne, taateenaꞌoyich wudoon immehine; ne guuno Daawitin gonde goraadoochee wodiihine.

¹¹ Boonoshi noonoo kootoon yibbaateebeeti, qanne kishoon tiijjiꞌi kootoon wogeebeeti, dallaaweenaꞌo kishoochee taan wodiibe.

¹² No anaami bushiisheenaꞌo boonoshi gurimaashittinoona gaawichii dicciibeeti bechoommon tunebeete; no maache bushiisheenaꞌo, taatee kexon macecikkoyich shuuneeti giimboommon tunebeete.

¹³ No goteenaꞌo bulli maayi yaroona ceeneete; no bageenaꞌo humooch beddaahaa shiyi shiijjereree, no gaddeenaꞌooch humaa xumoon tunebeete.

¹⁴ No miiminaꞌo aangibeete; shooraayeete; aallaayeete; no gommooch caagee eefo beeyaaye.

¹⁵ Ebi diiroon daneebeeti maccoo diireetone; Doono Yeeri bi Nuggishoo tuneti asho diireetone.