Shoddo 143 - Kafa Linguistics Project

Daawitichi shoddo

¹ Doono Yeero, ta corootoon waayebe; ta qolloon ellebe; ne gibeneyoona, ne cadiqittinoonoo ta qolloon waayebe.

² Kashecho bulli ne aafooch cadiqo tuno bi qajjitoyich, ne guuno taan nallee gabberooch giddiyaahine.

³ Etto taan yookkitone; taan buricciꞌi butto tuniitone; manderooch ta kotemmoyich tuniiꞌi qitii batteeti ashoon taan shaahitone.

⁴ Ebich ta qiimitto miccitone; ta mullo qititone.

⁵ Wonnee yemeenoon gabiyoye; ne shuunoo bullin kichaa kindiihoye; ne kishee shuunoo bullin yexiihoye.

⁶ Ta kishoon ne waan yaggiyoye; shuuꞌi showoo amiyon qaatoommon ta kashe neen qaatiyane.

⁷ Doono Yeero, ta qolloon kaateree waayebe; ta qiimitto miccitone; ne aafoon ta waanee badd wochiyaahine; ne wochigaata, maash hammii beetinaꞌon shaahemmo taane.

⁸ Neen ta gibenetoyich ne shoodoon maaddi maaddoona taach bekkiibe; ta kasheen neech ta immetoyich ta hammemmi gommon taach dojjibe.

⁹ Doono Yeero, ne shoobooch ta giyetoyich, ta etteenaꞌo waanee taan wodiibe.

¹⁰ Ta Nuggishoo ne tunetoyich, ne daaggoon ta tuniyemmoyich taan dojjibe; gaawe ne Ayaano tate boochoona taan yaabibe.

¹¹ Doono Yeero, ne shigoyicha getiree ta kasheen quyebe; ne cadiqittinoona xuuxoochee taan kichibe.

¹² Taach shoodecho ne tunetoyich, ta etteenaꞌon aalliibe; ne guuno ta tunetoyich ta etteenaꞌon aalliibe.