Shoddo 140 - Kafa Linguistics Project

Yeerina Quyeyoyich Corooteeti Corooto

Shoddechinaꞌochi ukkiroyich, Daawitichi galletee shoddo

¹ Doono Yeero, gondeenaꞌo kishoochee taan wodiibe; hukkechinaꞌo kishoochee taan quyebe.

² Boonoshi mulloona gonde mooyon gabiyeete; wochii wochii koyoon tiijjiyeete.

³ Boonoshi heciyoonoo dingeroochoommon aciiheete; boonoshi manaashoo xekeree xuppattoommone.

⁴ Doono Yeero, gondeenaꞌo kishoochee taan quyebe; ta baatoon tephiyoyich gabiti hukkechinaꞌo kishoochee taan quyebe.

⁵ Geecechinaꞌo taach shaachoon shaachiyeete; taach dabboon dabbeheete; gommooch shaachoon taach shaachiyeete.

⁶ Doono Yeerin “Ta Nuggishoo neene” gettemmo taane; Doono Yeero, gaachee danoyich ta cookaa beeton waayebe.

⁷ Doono Yeero, giidechi wodiyechi ta Doonocho, koyee aabooba taan deebehine.

⁸ Doono Yeero, gondeenaꞌoyich boonoshi qaawiton immaahine; boonoshi gaboo ceennemmoyich tuniyaahine.

⁹ Taan giichiichii qelloon qeeqqerii beetinaꞌo, boonoshi koceyoo boonoshi toommooch wottebe.

¹⁰ Qaaqqee buno boonoshi toommooch kindibe; oppooch dupperee aroochee kechaayeete.

¹¹ Oonnecho, mooyo biich kaametaa hini showooch beeyaaye; gonde mooyo hukkechon dabbe yeshiree aalliibe.

¹² Doono Yeeri girechoyich nalliibeeto, xukketinaꞌoyichoo neexeebeeto, bi tunoon ariihoye.

¹³ Cadiqeenaꞌo iberoochaa neen galletemminaꞌone; kaameenaꞌo ne aafooch beeyemminaꞌone.