Shoddo 139 - Kafa Linguistics Project

Bullin Ariyechi Bulli Xaaꞌooch Beeti Yeeri

Shoddechinaꞌochi ukkiroyich, Daawitichi galletee shoddo

¹ Doono Yeero, taan boshaꞌa ariihine.

² Ne, ta timonaa ta kotoonon ariihine; ta gaboo bullin wohoochaa ariihine.

³ Shuunee toommooch ta beemon, kashaa ta beemonoo ciinnehine; ta shaaddo bullin xiishaꞌa ariihine.

⁴ Doono Yeero, ta heciyoochee keyaan bi beetaa, ta yibbaatoo bullin ariihine.

⁵ Ne, ta aafinaa ta gubbinooch beeto neene; ta shimbooch ne kishoon kotiihine.

⁶ Ebiyoommi ariyoo taan worganikkiye; ta shalligoyee damboone.

⁷ Ne Ayaanoyee amooch hammeshote? Ne aafoochee amooch aalleshote?

⁸ Shimaajj ta kechetaa ne arooch beetine; maash ta hammetaa ne arooch beetine.

⁹ Aabi keyooch yoobbaa ta hammetaa, woyee aabi-gimooch ta kotetaa,

¹⁰ aroochaanolla ne kishoona taan yaabihine; ne qanne kishoona taan manjiyaa yechehine.

¹¹ “Manderoo taan qeribe; woyee showoo ta guudoona xumebe” ta itaa,

¹² manderolla ne waanaa mandereyaache; xumoo areddoochoommon bekkee beetone; manderoo tuneba bekko ne waanaa ikkoone.

¹³ Ebiyoo ta ashittinoon, ne hallitoyich, ta indee maacooch taan koccaꞌa ne shuunetoyichiye.

¹⁴ Shattiitonaa worganeetona tuneti gommona ta halleetoyich neen galletehoye; ne shuunoo worganeetone; ebin gaawichaꞌa ariihoye.

¹⁵ Aashoochaa ta shuuneehooba, ta indee maacooch ta kocceehooba ta ashittino neech aacheeto toonoone.

¹⁶ Batt kocceyaani ta ashittinoon ne aafoona beeggehine; taach maacheti aabeenaꞌo batt wonneyaan bee, ne koberooch kooreeheete.

¹⁷ Yeero, ne gaboo am shaahoon oogetone; ta shalligoyee beshe gaminoone.

¹⁸ Haddiya ta getaa, qacoyee beshiꞌi woddehe. Tokketoochee tiyaꞌa andoo neenna tookkaa taane.

¹⁹ Yeero, abo gondeenaꞌon wuxishoo geta! Ashi kashee kichechinaꞌo ta waanee wohishoo geteeta!

²⁰ Ebi asheenaꞌo ne toommooch gondoon yibbaateheete; ne shigoonoo gondiiheete.

²¹ Doono Yeero, neen shixxii beetinaꞌon shixaano taane? Ne toommooch tiyii beetinaꞌon ciigeyaano taane?

²² Oogichaꞌa boonoshin shixxehoye; ta etto tuniyaꞌa boonoshin ciinneho.

²³ Yeero, taan bosheree ta mulloonoo beege; taan phireree ta gaboonoo ariibe.

²⁴ Ta maacooch gondo beegaata beege; bulli aabee gommona taan yaabibe.