Shoddo 138 - Kafa Linguistics Project

Galletee Corooto

Daawitichi shoddo

¹ Doono Yeero, ceeni mulloona neen galletehoye; nuggisheenaꞌo aafoochaa galletee shoddoon shoddemmo taane.

² Ne yaafee kexo waan goyinnemmo taane; ne shoodoonaa ne gibeneyoonoyich neen galletemmo taane; ne shigoonaa ne qaaroonon bulliyee beshoon ne oogiitoyich neen galletehoye.

³ Ne waan ta cookaa waayehine; ne hakkoona taan kupphiihine.

⁴ Doono Yeero, ne qaaroon boonoshi waayetoyich, showee toommooch beeti taateenaꞌo bulli neen galletebeete.

⁵ Doono Yeeri ne oogo, beshaa besho bi tunetoyich, ne tuniiti mooyoyich neech shoddebeete.

⁶ Doono Yeeri oogoona beshoo bi tunetaanoona hoxeeton dufaache; tunebaani geecechinaꞌon wohoochaa ariihe.

⁷ Xuuxo taan giishi gaatoona, ne ta kasheen wodiihine. Ta etteenaꞌochi kaaree toommooch ne mochoon tiijjihine; ne hakkoona taan wodiihine.

⁸ Doono Yeeri bi daaggoon ta toommooch ceechemmone; Doono Yeero, ne shoodo bulli yemeeneechone; ne kishee shuunoo tuneti taan duppaahine.