Shoddo 135 - Kafa Linguistics Project

Galletee Shoddo

¹ Haleluya! Doono Yeerich maddee beetinaꞌote, Doono Yeerichi shigoon galletebote.

² Doono Yeerichi yaafee kechi daggooch, no Nuggishoochi yaafee kechi addibaabooch, neexee beetinaꞌote, galletebote.

³ Deꞌo bi tunetoyich, Doono Yeerin galletebote; shoodecho bi tunetoyich bi shigoyich shoddebote.

⁴ Ebiyoo Doono Yeeri Yaaqobin bi qellicho, Israꞌeelinoo bi hajjoo, tuniiꞌi bi kaaccitoyichiye.

⁵ Doono Yeeri oogoo bi tunoon, no Doono nuggisheenaꞌo bulliyee besho bi tunoon, ariihoye.

⁶ Showoonaa shimaayoonooch, baharoonaa waarwaare aaco bullinooch, Doono Yeeri bi shunnimmon tuniyemmone.

⁷ Showee tuggoochee quboon qubiihe; amiyoo dihiyooba xeeyoon xeejjiihe; yongoon bi gotoochee kichiye.

⁸ Gibitsee showoochaa batti batt shiijjeton, ashoochee tiijjiꞌi gijjooch beddaahaa wuxito biine.

⁹ Gibitsee showoochaa Farooninaa bi iraasheenaꞌo bullinon naxoyich, worganikkiti malletoonaa gaakkechi shuunoonon shuunehe.

¹⁰ Meeti aageteenaꞌon aalliihe; giidechi taateenaꞌon wuxiye.

¹¹ Amooreenaꞌochi taatoo Sihoonin, Bashaanee taatoo Oogin Kanaanee taateenaꞌo bullin wuxiye;

¹² boonoshi showoon bi asheenaꞌo tuneti Israꞌeeleenaꞌoyich, hajjoo tuniiꞌi immiye.

¹³ Doono Yeero, ne shigo bulli yemeenoon manji beeyemmone; Doono Yeero, shiijjeroo bulliich shalligeyemmo neene.

¹⁴ Doono Yeeri bi asheenaꞌoyich nallemmone; bi maddechinaꞌoyichoo ariqqemmone.

¹⁵ Aageteenaꞌochi shahalleenaꞌo birewoonaa aachoonoochee shuuneeti ashi kishee shuuneenaꞌone.

¹⁶ Noonoo boonoshich beete; tunebaani yibbaateyaacheete; aafo boonoshich beete; tunebaani ciinaacheete;

¹⁷ waamo boonoshich beete; tunebaani waayeyaacheete; kashonolla hakkaacheete.

¹⁸ Boonoshin shuunetinaꞌo boonoshin shaahibeete; boonoshin gibenee beetinaꞌo boonoshin shaahibeete.

¹⁹ Israꞌeelee kechi asheenaꞌote, Doono Yeerin galletebote; Haroonichi kechi asheenaꞌote, Doono Yeerin galletebote.

²⁰ Lewichi kechi asheenaꞌote, Doono Yeerin galletebote; Doono Yeerin shattii beetinaꞌote, Doono Yeerin galletebote.

²¹ Yerusaalem beeti Doono Yeeri, Tsiyoonaa galleteebe! Haleluya!