Shoddo 119 - Kafa Linguistics Project

Yeerichi Sheeroon Naadoo

¹ Xallittinoona shaꞌee beetinaꞌo, Doono Yeerichi sheeroona hammii beetinaꞌo, diireetinaꞌone.

² Bi geteenaꞌon quyee beetinaꞌo, boonoshi ceeni mulloona biin qaawii beetinaꞌo, diireetinaꞌone.

³ Boonoshiyoo Yeerichi gommona hammiyeete; gonde mooyonoo tuniyaacheete.

⁴ Ne qociyoon kupphii no quyemmoyich, noon gettehine.

⁵ Ne qociyoon quyoona gibeneeto tunoon, am shaahoon shunnehote.

⁶ Ne getoochee ta aafoon bariyoo ta qayigaata, yeelleyaachemmo taane.

⁷ Tate ne dayinnetoon doyoona, kaame mulloona neen galletemmo taane.

⁸ Ne qociyoon quyemmo taane; ciroona taan duppaahine.

Yeerichi Sheeroyich Deꞌa Geto

⁹ Gurimaashoo xallittinoona beemon bi hakkemmo aabichireeshiye? Ne qaaroon quyoonane.

¹⁰ Ta ceeni mulloona ne waan wottehoye; ne geteenaꞌoochee ta keyaachemmoyich taan quyebe.

¹¹ Axaaxoona neen ta xuꞌaachemmoyich, ne qaaroon ta mullooch kotiihoye.

¹² Doono Yeero, galleteeti Nuggishoo neene; ne qociyoon taach dojjibe.

¹³ Ne noonoochee kechimmi geto bullin, ta noonoona awaajjemmo taane.

¹⁴ Ooge gaanno taan emirikkoommon, ne qociyoona beemo taan emirikkiye.

¹⁵ Ne qociyoon kichi kindii gabemmo taane; ta aafoon ne gommoochee bariyaachemmo taane.

¹⁶ Ne qociyoo taan emirikkiye; ne qaaroon batteyaachemmo taane.

Yeerichi Sheeroochee Daneebeeti Emiroo

¹⁷ Kashoona ta beeyemmonaa ne qaaroon ta quyemmonoyich, ne guuno taach gaawe mooyon tuniibe.

¹⁸ Ne sheeroochee worganikkiti mooyon ta beeggemmoyich, ta aafoon gaxxibe.

¹⁹ Ta, showee toommooch dallaawoo taane; ne geteenaꞌon taach aachiyaahine.

²⁰ Ta kashe bulli aabooch ne doyoon qaatoona nirahane.

²¹ Ne geteenaꞌoochee kechiibeeti, uppeti geecechinaꞌon kaarehine.

²² Ne getoon ta quyetoyich, boonoshi naagoonaa cooqqiroonon ta waanee wokkiibe.

²³ Iraasheenaꞌo koteechii taan boonoshi oonnitaanona ne guuno ta, ne sheeroon kichi kindi gabemmo taane.

²⁴ Ne geteenaꞌo taan emirikkiyeete; boonoshiyoo taan ciicciyeete.

Yeerichi Sheeroon Quyoyich Maaco

²⁵ Buttooch yacheeto taane; ne gibenikkitoommon taan wochi wodiibe.

²⁶ Ta mooyo bullin neech gettehoye; newoo waayehine; ne sheeroon taach dojjibe.

²⁷ Ne sheeroon ta shalligemmoyich tuniibe; worganeeti ne shuunoon kichi kindii gabemmo taane.

²⁸ Ta kashe ayinoona nirahane; taach ne gibenikkitoommon taan kupphiibe.

²⁹ Kootoon ta waanee wokkiibe; ne deꞌittinoona ne sheeroon taach dojjibe.

³⁰ Iberee gommon kaacceto taane; ta mulloon ne sheeroo waan wochito taane.

³¹ Doono Yeero, ne sheeroon manjiyaa yecheto taane; taan yeelliyaahine.

³² Wodde shalligoon taach ne immaa beetoyich, ne geteenaꞌon tuniyoyich shittemmo taane.

Shalligoon Danoyich Corooteeti Corooto

³³ Doono Yeero, ne qociyoon taach dojjibe; tawoo ciirooch beddaahaa quyemmo taane.

³⁴ Ne sheeroon ta quyemmoyich shalligoon taach imbe; ta ceeni mulloona ne sheeroyich yittemmo taane.

³⁵ Taan boonoshi emirikkii beetoyich, ne geteenaꞌona taan yaabibe.

³⁶ Gaanno waan tuneyaanoon, ne qaaro waan ta mulloon gaꞌiibe.

³⁷ Duube mooyon ciinoochee ta aafoon wochibe; ne gibenikkitoommon kashoona taan neechibe.

³⁸ Neen shattii beetinaꞌoyich ne gibenikkiti gibenee qaaroon, ne guuno taach ceechibe.

³⁹ Ne qociyoo gaaweto bi tunetoyich, ta shattaabeeti naagoon ta waanee wokkiibe.

⁴⁰ Ne geteenaꞌon sharaateto taane; ne cadiqittinoona kashoona taan neechibe.

Yeerichi Sheeroona Degeyoo

⁴¹ Doono Yeero, ne shoodoon taach bekkiibe; ne gibenikkitoommon taan wodiibe.

⁴² Ne qaaroon ta gibenetoyich, taan naaggii beetinaꞌoyich noonoo wochemmo taane.

⁴³ Ne sheeroon ta gibenetoyich, ibere ne qaaroon ta noonoochee kuxxaahine.

⁴⁴ Bulli yemeenoon ne sheeroon quyemmo taane.

⁴⁵ Ne qociyoon ta quyetoyich shataanoon beeyemmo taane.

⁴⁶ Ne geteenaꞌona yeelleyaachemmo taane; taateenaꞌo aafoochaanoo gettemmo taane.

⁴⁷ Ne geteenaꞌon ta shunnaa beetoyich, boonoshina emiroon danehoye.

⁴⁸ Ta shunnaabeeti ne geteenaꞌon oogiyemmo taane; ne qociyoonoo kichi kindii gabemmo taane.

Yeerichi Sheeroon Gibeno

⁴⁹ Ne guuno taach ne gibenikkiti qaaroon gabibe; gibenoona ta quyaabeeto arooniye.

⁵⁰ Ne gibenikkiti qaaro taach kashoon bi immitoyich, ebina ta xuuxee aabooba goggemmo taane.

⁵¹ Geecechinaꞌo taan cooqqiriyeete; tunebaani ta, ne sheeroochee ikaano taane.

⁵² Doono Yeero, wonnee ne sheeroon gabiyoye; ebinoo goggehoye.

⁵³ Ne sheeroon qajjiti asheenaꞌochi naboona oogichaꞌa ippehoye.

⁵⁴ Dallaawoo tunaꞌa ta beeti showoochaa ne qociyoo taach shoddoon tunehe.

⁵⁵ Doono Yeero, xumoona ne shigoon gabiyoye; ne sheeroon quyehoye.

⁵⁶ Ne getoyich deꞌa ta itoyich emiroon danoye.

Yeerichi Sheeroyich Deꞌa Geto

⁵⁷ Doono Yeero, ta qoodee iristo neene; ne qaaroon quyeya maacceto taane.

⁵⁸ Ne gibenikkitoommon taach ne ariqqemmoyich ta ceeni mulloona neen qollehoye.

⁵⁹ Ta gommon gabaꞌa ta shaaddoon ne qociyoo waan wochiyoye.

⁶⁰ Kaataꞌa ne geteenaꞌon ceechihoani, nibbeyaano taane.

⁶¹ Gondeenaꞌo taach shaachoon shaachiyeete; tunebaani ta, ne sheeroon batteyaano taane.

⁶² Tate ne dayinnetoyich neen galleteya xumee gutte qellimooch tiyehoye.

⁶³ Ta, neen shattii beetinaꞌoyich, ne geteenaꞌon quyee beetinaꞌoyich, nuuchoo taane.

⁶⁴ Doono Yeero, ne shoodo showoona ceennitone; ne qociyoon taach dojjibe.

Yeerichi Sheeree Oogittino

⁶⁵ Doono Yeero, ne gibenikkitoommon ne guuno taach gaawe mooyon tuniitine.

⁶⁶ Ne geteenaꞌon ta gibenaa beetoyich, shalligoonaa ariyoonon taach imbe.

⁶⁷ Taan ne sheeraani beehooba muriccaa beehoye; tunebaani and ne qaaroon quyaabeeto taane.

⁶⁸ Ne, deꞌo neene; ne shuunoo deꞌoone; taach ne qociyoon dojjibe.

⁶⁹ Geecechinaꞌo ta shigoon gondiiheete; tunebaani ta, ne getoon ta ceeni mulloona quyehoye.

⁷⁰ Boonoshi mullo manje muumoone; tunebaani ta, ne sheeroona emiriyoye.

⁷¹ Ne qociyoon ta doyemmoyich bi tunetoyich, taan ne sheerito taach gaaweto tunetone.

⁷² Dofee aachoonaa xure birewoonoyee, ne noonoochee kechiibeeti sheeroo taach beshoone.

Yeerichi Sheeroo Tato Tuno

⁷³ Taan hallii shuuneto, ne kishoone; ne geteenaꞌon ta doyemmoyich taan shalligecho tuniibe.

⁷⁴ Ne qaaroon gibenaa ta beetoyich, neen shattii beetinaꞌo taan beegiree emiremminaꞌone.

⁷⁵ Doono Yeero, ne dayinneto tato bi tunoon ariyaabeeto taane; taan ne sheerito gibeneeto ne tunetoyichiye.

⁷⁶ Ne guuno taach ne gibenikkitoommon ne shoodo taan goggiibe.

⁷⁷ Ne sheeroona ta emiraa beetoyich, kashoona ta beeyemmoyich taach ariqqebe.

⁷⁸ Geecechinaꞌo kootoon taan boonoshi taggetoyich, yeellebeete; tunebaani ta, ne getoon kichi kindii gabemmo taane.

⁷⁹ Neen shattii beetinaꞌo ne qociyoon ariyoyich ta waan wottebeete.

⁸⁰ Ta yeelleyaachemmoyich, ta mullo ne qociyoona xalloo tunebe.

Wodoyich Corooteeti Corooto

⁸¹ Ta kashe ne wodiyoon sharaatehane; ne qaaroonoo gibenehoye.

⁸² “Taan ne goggiyemmo aatane?” getona, ne gibenee qaaroon quyoonoo, ta kashe nirehane.

⁸³ Cufeexi mollexxoon ta shaahitaanona ne qociyoon batteyaano taane.

⁸⁴ Ne guuno ta haaꞌii beeyemmo aati wottooniye? Taan duꞌii beetinaꞌo toommooch ne nallemmo aatane?

⁸⁵ Ne sheeroona hamaani geecechinaꞌo taach oppoon iijjiyeete.

⁸⁶ Ne geteenaꞌo bulli ibereenaꞌone; naboo aalloon taan boonoshi duꞌii beetoyich, taan gaachebe.

⁸⁷ Showee toommoochee taan aalliiya bedditinaꞌone; tunebaani ta ne geteenaꞌon qayaano taane.

⁸⁸ Ne qociiti qociyoon ta quyemmoyich, ne shoodoona taan wodiibe.

Yeerichi Qaaroon Gibeno

⁸⁹ Doono Yeero, ne qaaro manjiree, bulli aabooch shimaayooch manjiree beeyemmone.

⁹⁰ Ne gibeneyoo shiijjeroo bulliich beddaahaane; showoon hecceto neene; aroo manjiree beeyemmone.

⁹¹ Bulli mooyonona ne maddechinaꞌo boonoshi tunetoyich, ne getoommona manjiree beeyemminaꞌone.

⁹² Ne sheeroo taach emiroo bi imaanee gaata, ta xuuxehooba aallesho taane.

⁹³ Boonoshina kashoon taach ne immetoyich, ne geteenaꞌon ciroona batteyaache.

⁹⁴ Ta neecho taane; ne qociyoon ta qaawitoyich taan wodiibe.

⁹⁵ Gondeenaꞌo taan aalliyoyich ottiyeete; tunebaani ta, ne sheeroon kichaa kindiyaa gabiyoye.

⁹⁶ Bulli mooyoyich ciiro beemon beeggehoye; tunebaani ne geteenaꞌoyich tuggo aalloone.

Yeerichi Getoon Shuno

⁹⁷ Ne getoon am shaahoon shunnehote; heeyo bullin kichaa kindiyaa gabiyoye.

⁹⁸ Ne geteenaꞌo amee aaboobolla tayee baraaneenaꞌo boonoshi tunetoyich, ta etteenaꞌoyee beshe ariyechon taan tuniiheete.

⁹⁹ Ne qociyeenaꞌon kichaa kindiyaa ta gabaa beetoyich, taan dojjechinaꞌo bulliyee beshe shalligoo taach beetone.

¹⁰⁰ Ne geteenaꞌoyich deꞌa ta iyaa beetoyich, geeneenaꞌoyee beshoon shalligiyoye.

¹⁰¹ Ne qaaroon quyoyich, ta baatoon gondo bulliichee wochiyoye.

¹⁰² Taan ne dojjitoyich ne qociyoochee ikaano taane.

¹⁰³ Ne qaaro am shaahoon taach shaawiye! Eeyoyee beshoon ta kookkooch noocciye.

¹⁰⁴ Ne sheeroochee shalligoon doyiyoye; ebich kootee gommon shixxehoye.

Yeerichi Qaaroochee Daneebeeti Bekko

¹⁰⁵ Ne qaaro ta baatoyich ceechoone; ta gommoyichoo bekkoone.

¹⁰⁶ Tate ne dayinnetoon quyoyich, manjiyaa wogehoye.

¹⁰⁷ Doono Yeero, oogichaa xuuxeto taane; ne gibenikkitoommon kashoona taan neechibe.

¹⁰⁸ Doono Yeero, ta galletee deejjoon deꞌe; ne geteenaꞌon taach dojjibe.

¹⁰⁹ Bulli aaboon ta kasheen qitooch beshiyaa imona beehoye; tunebaani ne sheeroon batteyaano taane.

¹¹⁰ Gondeenaꞌo taach shaachoon shaachiyeete; tunebaani ta, ne getoochee ikaano taane.

¹¹¹ Ne qociyoo bulli yemeenoon ta hajjoone; ta mulloo ebina emiriye.

¹¹² Ne geteenaꞌon bulli yemeenoon quyoyich, ciirooch beddaahaa maacceto taane.

Yeerichi Sheeroona Deebeyoo

¹¹³ Gutte gabechi asheenaꞌon shixxehoye; tunebaani ne sheeroon shunnehoye.

¹¹⁴ Ne, taach shoobi xaaꞌoonaa gaachoona neene; ne qaaroon gibenehoye.

¹¹⁵ Ta Nuggishoochi geteenaꞌon ta quyemmoyich gondeenaꞌote, ta waanee wohote.

¹¹⁶ Kashoona ta beeyemmoyich ne gibenikkitoommon taan dege; ta gibenoonoo yeellayona.

¹¹⁷ Ta wodemmoyich taan dege; bulli aaboon ne qociyoon quyemmo taane.

¹¹⁸ Boonoshi koceyoo duubo bi tunetoyich, ne qociyoochee kechii beetinaꞌo bullin hoxehine.

¹¹⁹ Showee toommeexi gondeenaꞌon guudoochoommon aalliyemmo neene; ebich ne qociyoon shunnehoye.

¹²⁰ Ta ashittino neen shatona qewehe; ne dayinnetoon beeggaꞌa shattehoye.

Yeerichi Qociyoyich Yito

¹²¹ Tate mooyonaa cadiqoonon tuniito taane; xuuxiyemminaꞌoyich taan beshii immaahine.

¹²² Ne guuno ta diggittinoyich buushaaroo tunebe; geecechinaꞌo taan xuqqemmoyich tuniyaahine.

¹²³ Ta aafo ne wodiyoon cadiqe ne qaaroon quyoona taahiye.

¹²⁴ Ne shoodee woddoommona ne guuno taach deebe; ne qociyoon taach dojjibe.

¹²⁵ Ne guuno taane; ne qociyoon ta ariyemmoyich, taach shalligoon imbe.

¹²⁶ Doono Yeero, ne sheeroo happeebeeto bi tunetoyich, hini ikke mooyon ne tuniyemmi aaboone.

¹²⁷ Ne geteenaꞌon aachoyee, xalle aachoyee beshoon shunnehoye.

¹²⁸ Ebich ne geteenaꞌo bullin dabbiyoye; koote gommo bullinoo shixxehoye.

Yeerichi Sheeroon Quyoyich Qaawoo

¹²⁹ Ne qociyeenaꞌo worganeetinaꞌone; ebich manjayi yechemmo taane.

¹³⁰ Ne qaaroon doyoo bekkoon immiye; tuusheenaꞌon shalligechinaꞌo tuniihe.

¹³¹ Ne geteenaꞌon ta qaatitoyich, qaawoona kasho guuteehoye.

¹³² Neen shunnii beetinaꞌoyich ne ariqqoommon, ta waan wotteree taach ariqqebe.

¹³³ Ne gibenee qaaroona taan yaabibe; axaaxoo ta toommooch taataaye.

¹³⁴ Ne geteenaꞌon quyoon ta hakkemmoyich, neexaa hajjeyoochee taan wodiibe.

¹³⁵ Ne guuno ta toommooch ne aafoon biriibe; ne qociyoonoo taach dojjibe.

¹³⁶ Asheenaꞌo ne sheeroon quyo boonoshi qajjitoyich, ta aafo acimoona taabbehe.

Yeerichi Qociyoo Tato Tuno

¹³⁷ Doono Yeero, ne cadiqo neene; ne dayinneto dabaalloone.

¹³⁸ Ne qociyoon cadiqittinoona neechihine; ebiyoo bullina gibeneetone.

¹³⁹ Ta etteenaꞌo ne qaaroon aaxxiyo qajjitoyich, qanaato taan michiye.

¹⁴⁰ Ne gibenikkiti qaaro oogeton phireeꞌi beshetone; ne guuno tawoo ebin shunnehoye.

¹⁴¹ Ta, giishecho, hoxeetoo taane; tunebaani ne qociyoon batteyaache.

¹⁴² Ne cadiqittino bulli yemeeneechone; ne sheeroo iberoone.

¹⁴³ Iritoonaa xuuxoona taan yechiye; tunebaani ne geteenaꞌo taan emirikkiyeete.

¹⁴⁴ Ne qociyoo bulli yemeenoon cadiqoone; kashoona ta beeyemmoyich shalligoon taach imbe.

Etto Kishoochee Wodoyich Corooteeti Corooto

¹⁴⁵ Doono Yeero, ceeni mulloochee tiijjaꞌa cookiyoye; ta cookoon waayebe; ne qociyoonoo quyemmo taane.

¹⁴⁶ Ne waan cookiyoye; taan wodiibe; ne sheeroonoo quyemmo taane.

¹⁴⁷ Taan ne gaachemmoyich haraan beetaa tiyaꞌa ne waan cookiyoye; ne qaaroonoo gibenehoye.

¹⁴⁸ Ne qaaroon kichii kindii gaboyich, xumo bullin ta aafooch shininno yexaanoone.

¹⁴⁹ Doono Yeero, ne shoodoommona ta qaaroon waayebe; ne dayinnetoommona kashoona ta beeyemmoyich tuniibe.

¹⁵⁰ Gondoon gabiꞌi taan yookkii beetinaꞌo katinnitinaꞌone; boonoshi ne sheeroochee wokkitinaꞌone.

¹⁵¹ Tunebaani Doono Yeero, ne, taach katinoo neene; ne geteenaꞌo bulli ibereenaꞌone.

¹⁵² Ne geteenaꞌo bulli yemeenoon boonoshi beeyemmoyich ne tuniyoon, wonnee tiijjaꞌa ne geteenaꞌoochee ariito taane.

Yeer Waan Corootoo

¹⁵³ Ne sheeroon batteyaano ta tunetoyich, ta iritoon beegiree taan wodiibe.

¹⁵⁴ Ta qoodoon taggebe; taan biishebe; ne gibenikkitoommon kashoona taan neechibe.

¹⁵⁵ Ne qociyoon qaawoo boonoshi qajjitoyich, wodoo gondeenaꞌo waanee wohone.

¹⁵⁶ Doono Yeero, ne ariqqo woddoone; ne dayinnetoommona kashoona taan neechibe.

¹⁵⁷ Taan duꞌii beetinaꞌonaa ta etteenaꞌona meetinaꞌone; tunebaani ta, ne qociyoochee ikaache.

¹⁵⁸ Ne geteenaꞌon quyeyaaneenaꞌo boonoshi tunetoyich, gibeneyaaneenaꞌon ciinnaꞌa hoxehoye.

¹⁵⁹ Doono Yeero, ne qociyeenaꞌon am shaahoon ta shunnaabeeto gaata beege; ne shoodoommona ta kasheen wodiibe.

¹⁶⁰ Doono Yeero, ne qaaro bulli iberoone; tate ne dayinneto bulli, bulli yemeeneechone.

Yeerichi Sheeroyich Yito

¹⁶¹ Iraasheenaꞌo naboo aalloon taan yookkiyeete; tunebaani ta mullo ne qaaroyich qewehe.

¹⁶² Wodde kecoon daneꞌi emiriibeeti ashichoommon, ne qaaro taan emirikkiye.

¹⁶³ Kootoon shixxehoye; tiyaarehoye; tunebaani ne qaaroon shunnehoye.

¹⁶⁴ Tate ne dayinnetoyich, heeyooch shabaatte wottoon neen galletehoye.

¹⁶⁵ Ne sheeroon shunnii beetinaꞌoyich ooge diggoo beetone; boonoshin tephemmi amee mooyolla aalloone.

¹⁶⁶ Doono Yeero, ne wodiyoon gibenehoye; ne geteenaꞌon waayehoye.

¹⁶⁷ Ne qociyeenaꞌon quyehoye; ta mulloochee eboshin shunnehoye.

¹⁶⁸ Ta gommo bulli ne aafooch bi tunetoyich, Ne geteenaꞌonaa ne qociyeenaꞌonon quyehoye.

Gaachee Danoyich Corooteeti Corooto

¹⁶⁹ Doono Yeero, ta cookoo ne aafooch shage; ne gibenikkitoommon shalligoon taach imbe.

¹⁷⁰ Ta qollo ne aafooch shage; ne gibenikkitoommon taan wodiibe.

¹⁷¹ Ne qociyoon taach ne dojjaa beetoyich, bulli aabooch neen galletehoye.

¹⁷² Ne geteenaꞌo bulli tateenaꞌo boonoshi tunetoyich, ne qaaroyich shoddemmo taane.

¹⁷³ Ne geteenaꞌon ta kaaccetoyich, ne mochoona taan gaachebe.

¹⁷⁴ Doono Yeero, ne wodiyoon sharaatehoye; ne sheeroo taan emirikkiye.

¹⁷⁵ Neen ta galletemmoyich kashoona beebona; ne qociyoo taan gaachebe.

¹⁷⁶ Aalleti bagoochoommon yallyallimito taane; ne geteenaꞌon batteyaano ta tunetoyich, ne guuno taan qaawibe.