Shoddo 118 - Kafa Linguistics Project

Wudoo Danetoyich Yeerin Galleto

¹ Deꞌo bi tunetoyich, Doono Yeerin galletebote; bulli yemeenee shoodechone.

² Israꞌeelee asheenaꞌo “Bi, bulli yemeenee shoodechone” geteete.

³ Harooni kechi asheenaꞌo, “Bi, bulli yemeenee shoodechone” geteete.

⁴ Doono Yeerin shattii beetinaꞌo “Bi, bulli yemeenee shoodechone” geteete.

⁵ Ta duꞌehooba Doono Yeer waan cookiyo; Doono Yeeri ta cookoon waayeꞌi duꞌoochee taan kichiye.

⁶ Doono Yeeri taanna tookkiiniye; shataache; asho taan amoon halleshone?

⁷ Doono Yeeri taan gaacheya ta gaꞌooch beetone; ta etteenaꞌochi dihoon beeggemmo taane.

⁸ Ashoon gibenoyee Doono Yeerichi shoobooch gimo gaawiye.

⁹ Iraasheenaꞌon gibenoyee Doono Yeerichi shoobooch gimo gaawiye.

¹⁰ Aageteenaꞌo bulli taan giichiyeete; tunebaani Doono Yeerichi shigoona boonoshin aalliihoye.

¹¹ Ta guudo bullina tuneꞌi taan giichiyeete; tunebaani Doono Yeerichi shigoona boonoshin aalliihoye.

¹² Maxochoommon ta toommooch buundiyeete; tunebaani angichi qaaqqoochoommon miccii aalleheete; Doono Yeerichi shigoona boonoshin aalliihoye.

¹³ Oogichaa xukkeho, dihoyichoo tattellehoye; tunebaani Doono Yeeri taan gaachehe.

¹⁴ Doono Yeeri ta giidoonaa ta shoddoonane; biyoo taan wodiyecho tunehe.

¹⁵ Cadiqeenaꞌochi duukkaanoochaa wudoo danetoyich, ililoo waayeehe; Doono Yeerichi mochoo wudoon danehe.

¹⁶ Doono Yeerichi mochoo oogehe; Doono Yeerichi mochoo wudoon danehe.

¹⁷ Qitaanoon kashoona beeyemmo taane; Doono Yeerichi shuunoon miixemmo taane.

¹⁸ Doono Yeeri taan oogichii kaarehe; tunebaani ta qitemmoyich tuniyaanoone.

¹⁹ Aroona giyiree Doono Yeerin ta galletemmoyich, yaafee kechi kelloon taach qechibote.

²⁰ Hini Doono Yeerichi kelloone; cadiqeenaꞌo aroona giyemminaꞌone.

²¹ Ta qolloon ne waayetoyich, taan ne wodiitoyichoo, neen galletehoye.

²² Gimbeyneenaꞌo hoxee duppiti xaqqo, aroo kexon deggii neechiibeeti giimbee guummon tunehe.

²³ Hini Doono Yeeri shuunoone; ebiyoo no aafooch worganikkitone.

²⁴ Hini Doono Yeeri bi shuuneti decone; ebina emiribone; emiroonoo wucwucone.

²⁵ Doono Yeero, noon wodiibe; Doono Yeero, nooch kaachibe.

²⁶ Doono Yeerichi shigoona waabeeto diireetone; Doono Yeerichi yaafee kexoochaa ittoshin diiriyone.

²⁷ Doono Yeeri Nuggishoone; bekkoon nooch bekkiitone. Michi kishoon yeshiree deejjee gudee qareechi guudoona baaroon wonnibote.

²⁸ Ne, ta Nuggishoo neene; neen galletemmo taane; ne ta Nuggishoo neene; neen oogiyemmo taane.

²⁹ Deꞌo bi tunetoyich, Doono Yeerin galletebote; bulli yemeenoon shoodechone.