Shoddo 116 - Kafa Linguistics Project

Qitoochee Woditochi Galleto

¹ Ta cookoon, ta qolloon bi waayetoyich, Doono Yeerin shunnehoye.

² Bi waamon ta waan bi gaꞌitoyich, ta kashee yemeeno bulliich bi waan corootemmo taane.

³ Qitoo dabboochoommon taan yechiye; maash hamo taan maaceriihe; xuuxoonaa ayinoona taan maahe.

⁴ Doono Yeerichi shigoon ceeggehoye; “Doono Yeero, ta kasheen wodiibe” iyaꞌa qollehoye.

⁵ Doono Yeeri ariqqechonaa cadiqoonane; no Nuggishoo maarechone.

⁶ Diqqeenaꞌon Doono Yeeri quyehe; oogichaa ta iriteehooba taan wodiitone.

⁷ Doono Yeeri neech bi gaawetoyich, ta kasheene, ne tooꞌi xaaꞌooch wottebe.

⁸ Ne, ta kashoon qitoochee ta aafoon acimoochee, ta baatoon tepheyoochee, wodiihine.

⁹ Kashechinaꞌo beeti hini showoochaa Doono Yeeri aafooch shaꞌemmo taane.

¹⁰ “Oogichaꞌa duꞌeto taane” ta iyoobolla ta gibenoon qayaano taane.

¹¹ Ta keqqiyooba, “Asho bullin gibeno duuboone” iyo.

¹² Taach bi tuniiti gaawe mooyo bullich, Doono Yeerich amoon gaacote?

¹³ Uyee buuroon giddiyemmo taane; Doono Yeerichi shigoon ceeggemmo taane.

¹⁴ Bi asho bulli aafoochaa ta tiikkeshoon Doono Yeerich giddiyemmo taane.

¹⁵ Bi yaafeenaꞌochi qitoo Doono Yeeri aafoochaa aaxxoone.

¹⁶ Doono Yeero, ne guuno taane; ne gonneechi bushoo ne guuno taane; ta cuyoon biichetine.

¹⁷ Galletee deejjoon neech deejjemmo taane; Doono Yeerichi shigoon ceeggemmo taane.

¹⁸ Bi asho bulli aafoochaa ta tiikkeshoon Doono Yeerich giddiyemmo taane.

¹⁹ Yerusaaleme, ebinoo ne daggoochaa, Doono Yeerichi addibaaboochaa tuniyemmo taane. Haleluya!