Shoddo 115 - Kafa Linguistics Project

Yeerich Tun Bede Galleto

¹ Nooch tuneyaanoon, Doono Yeero, nooch tuneyaanoon, ne shoodoonaa ne gibeneyoonoyich, ne shigoyich oogo tunebe.

² Aageteenaꞌo amoyich, “Boonoshi Nuggishoo aaye?” geteeta?

³ No Nuggishoo shimaayoochiye; biin emirikkimmon tuniyemmone.

⁴ Boonoshi shahalleenaꞌo birewoonaa aachoonoochee, ashi kishoona shuuneetinaꞌone.

⁵ Boonoshich noonoo beetone; tunebaani yibbaateyaacheete; aafo beetone; tunebaani ciinaacheete.

⁶ Boonoshich waamo beetone; tunebaani waayeyaacheete; muddoo beetone; tunebaani shiiqqeyaacheete.

⁷ Boonoshich kishoo beetone; tunebaani shafeyaacheete; baatoo beetone; tunebaani shaꞌeyaacheete; boonoshi kookkoocheenoo qaaroon kichoon hakkaacheete.

⁸ Boonoshin shuunetinaꞌo, boonoshin gibenee beetinaꞌo, boonoshiyoomminaꞌone.

⁹ Israꞌeeleenaꞌote, Doono Yeerin gibenebote; ittoshi degoonaa ittoshi gaachoona biine.

¹⁰ Haroonichi kechi asheenaꞌote, Doono Yeerin gibenebote; ittoshi degoonaa ittoshi gaachoona biine.

¹¹ Doono Yeerin shattii beetinaꞌote, Doono Yeerin gibenebote; ittoshi degoonaa ittoshi gaachoona biine.

¹² Doono Yeeri noon gabemmone; noonoo diiremmone; Israꞌeelee asheenaꞌon diiremmone; Harooni kechi asheenaꞌon diiremmone.

¹³ Doono Yeeri biin shattiibeeti, ogoogeenaꞌonaa giisheenaꞌonon diiremmone.

¹⁴ Doono Yeeri ittoshinaa ittoshi bushiishoonon woddiibe.

¹⁵ Showoonaa shimaayoonon halliti, Doono Yeeri ittoshin diiribe.

¹⁶ Shimaayeexi shimaayoo Doono Yeerichone; tunebaani showoon ashi bushiishoyich immiye.

¹⁷ Qititinaꞌo, maash hammitinaꞌo, Doono Yeerin galleteyaacheete.

¹⁸ Tunebaani no andee tiijjaꞌa bulli yemeenoon, Doono Yeerin galletehone. Haleluya!