Shoddo 112 - Kafa Linguistics Project

Doono Yeerin Shattiibeeti Ashi Diireyoo

¹ Haleluya! Doono Yeerin shattiibeeto, bi geteenaꞌona oogichii emiriibeeto, diireetone.

² Bi yareenaꞌo showee toommoochaa giidechinaꞌo tunemminaꞌone; kaamoochi shiijjereenaꞌo diireyemminaꞌone.

³ Gaannoonaa adduunoona bi kexooch tunemmone; bi cadiqoo bulli yemeenoon beeyemmone.

⁴ Deꞌo, ariqqechonaa cadiqoona bi tunetoyich, kaame ashich manderoochaa bekko koojjemmone.

⁵ Wojjiibeeti, hirigaanoonoo erettiibeeti, kaamittinoona shuuneebeeti ashich kaamemmone.

⁶ Cadiqe asho ciroona geewaachemmone; bulli yemeenoon shalligee beeyemmone.

⁷ Gonde yibbaatoo biin keqqichaachemmone; Doono Yeerin gibenoona bi mulloo manjoone.

⁸ Bi etteenaꞌochi dihoon bi beeggimmi wottoon, bi mullo manjoone; shataachemmone.

⁹ Mulloochee tiijjiꞌi girechinaꞌoyich immiye; bi cadiqoo bulli yemeenoon beeyemmone; biyoo giidechonaa moogeetona tunemmone.

¹⁰ Gonde asho ebin beegiree ippemmone; gasho shaaccemmone; muuyishoo gettemmone; gondeenaꞌochi qaatoo duubemmone.