Shoddo 109 - Kafa Linguistics Project

Iritee Daggooch Beeti Ashi Corooto

Shoddechinaꞌochi ukkiroyich, Daawiti shoddeti galletee shoddo

¹ Neen ta galletaabeeti Nuggishoocho, cikkii qajjaahine.

² Gondeenaꞌonaa dachechinaꞌona ta toommooch tiyiyeete; ta mooyon gondii, kootoon yibbaateheete.

³ Ta guudoon guuddiꞌi taan shixona yibbaateheete; naboo aalloon taanna koyeheete.

⁴ Boonoshin ta shunnetaanona taan taggeheete; tunebaani ta boonoshich corootiyoye.

⁵ Deꞌee kaalloon gondoon wochiyeete; ta shunneti keroon taan shixxiyeete.

⁶ Biin taggemmon bi toommooch tiijjibe; taggechoo bi qannooch neexebe.

⁷ Bi taggehooboo xoobiree wottebe; bi corooto biich axaaxoo tuneree haddeebe.

⁸ Bi eeno qamine; bi ukkirittinoon baroo deꞌe.

⁹ Bi bushiisheenaꞌo nihaalleenaꞌo tunebeete; bi mecheyoo xuumee tunebuye.

¹⁰ Bi bushiisheenaꞌo qollooch yallyallimibeete; happeeti boonoshi kexoochee yookkebeete.

¹¹ Biich beeto bullin hiishecho deꞌe; bi aayo bullin dallaaweenaꞌo bogeete.

¹² Biich ariqqemmon danaaye; nihaalli bi bushiisheenaꞌon maaxemmo danaaye.

¹³ Bi maanoo dooge; ikke shiijjeroyee gubb bi shigo hideebe.

¹⁴ Bi qaabbechinaꞌochi axaaxoo Doono Yeeri aafoochaa gabeebe; bi indeechi axaaxoo batteyaaye.

¹⁵ Eboshichi axaaxoon Doono Yeeri bulli aabooch gabibe; boonoshi shalligichoo showee toommoochee bi waaxemmoyich tuniibe.

¹⁶ Girechon, amaalloonaa bi mulloo tiishetonon, qitooch beddaahaa xuqqiyani, ariqqecho tunoon gabaanoone.

¹⁷ Ufon shunniye; ufoo bi waan wobe! Diiroon shunaanoone; diiroo bi waanee wohe!

¹⁸ Ufon tahoochoommon tahehe; bi ashittinooch aacochoommon, bi shaawushoochoo zayitoochoommon gibe.

¹⁹ Bi taheebeeti tahoommon, bulli aaboonoo bi cuyeebeeti shachoommon tunebe.

²⁰ Taan gondii yibbaatee beetinaꞌoyich, taan taggee beetinaꞌoyich, Doono Yeeri ebin qoce.

²¹ Tunebaani ta Nuggishoo Doono Yeero, ne shigoyicha getiree taach ariqqebe; ne shoodo gaaweto bi tunetoyich, taan wodiibe.

²² Ta, girechonaa amaalloona ta tunetoyich, ta mulloo buricehe.

²³ Womikkee yiirittoochoommon, dooggeto taane; gechoochoommon oojjeto taane.

²⁴ Ta guteneenaꞌo coomoona nireheete; ta meeno dalliye.

²⁵ Taan taggee beetinaꞌona cooneehoye; taan boonoshi beegigaata, qelloon qeeqqereheete.

²⁶ Ta Nuggishoo Doono Yeero, taan gaachebe; ne shoodoommona taan wodiibe.

²⁷ Doono Yeero, ebin ne tuniyoon, taan ne wodiyoon, ta etteenaꞌo beegeete.

²⁸ Boonoshi taan uppiyeete; tunebaani ne diirihine; ta toommooch tiyii beetinaꞌo yeellebeete; tunebaani ne guuno ta emiroona wucwuccehoye.

²⁹ Taan taggee beetinaꞌo cooneyoon tahebeete; yeelloonoo tahoochoommon xappibeete.

³⁰ Doono Yeerin oogichi galletemmo taane; ooge iitee daggoochaa biin galletemmo taane.

³¹ Ebiyoo qitooch nalleeton bi wodiitoyich, amaalloochi qannooch bi neexetoyichiye.