Shoddo 107 - Kafa Linguistics Project

UUCHINNEE KUXO ( Shoddo 107–150 ) Doono Yeeri Deꞌittinoyich Giddeebeeti Galleto

^1-3 Doono Yeeri biishetinaꞌote, etto kishoochee bi wodiitinaꞌote, aabi-keyo waaninaa aabi-gimo waaninoochee, dambi-waaninaa deshi-waaninoochee, bare showoocheenoo deebii bi kicitinaꞌote, deꞌo bi tunetoyich, bi shoodo bulli yemeeneecho bi tunetoyich, Doono Yeerin galletebote.

⁴ Ikkikkeenaꞌo barahooch yallyallimiyeete; boonoshi beeyemmi katemooch shakkiibeeti gommon mucceheete.

⁵ Shaacee shacheweheete; kashoo guuteeheete.

⁶ Boonoshi xuuxee aabooba Doono Yeer waan cookiyeete; biyoo boonoshi iritoochee boonoshin wodiihe.

⁷ Boonoshi beeyemmi katemooch kaame gommona boonoshin yaabiye.

⁸ Doono Yeerin bi shoodoyich, ashi bushiishoyich bi tuniiti worganikkiti mooyoyich, galletebeete.

⁹ Ebiyoo shacheweton bi digaayiitoyich, shaaceton gaawe mooyona bi michiitoyichiye.

¹⁰ Ikkikkeenaꞌo dunne manderooch koteheete; xuuree qoqqaannoonoo qoqqaanneeꞌi beeheete.

¹¹ Ebiyoo Doono Yeerichi qaaree toommooch boonoshi tiyitoyich, Beshoo Yeerichi ciicoon boonoshi qallayitoyichiye.

¹² Biyoo magge shuunoona boonoshi quumo niremmoyich tuniihe; dihiyeete; boonoshin gaachemmo aallehe.

¹³ Aroochee boonoshi xuuxehooba Doono Yeer waan cookiyeete; biyoo boonoshi iritoochee boonoshin wodiihe.

¹⁴ Manderoochee, dunne manderoocheenoo boonoshin kichiye; boonoshi qoqqaannoonoo boonoshich tiichiye.

¹⁵ Doono Yeerin bi shoodoyich, ashi bushiishoyich bi tuniiti worganikkiti mooyoyich, galletebeete.

¹⁶ Ebiyoo gooshee shaaqqeenaꞌon bi tiichitoyich, xuuree tuggeenaꞌon bi buriccitoyichiye.

¹⁷ Ikkikkeenaꞌo boonoshi hukkee naboona mullaalleenaꞌo tuneheete; boonoshi axaaxee naboonoo xuuxeheete.

¹⁸ Maayoonoo shaateeheete; qitooch beddiyeete.

¹⁹ Aroochee boonoshi xuuxee aabooba Doono Yeer waan cookiyeete; biyoo boonoshi iritoochee boonoshin wodiihe.

²⁰ Bi qaaroon deejjiꞌi boonoshin wodiihe; aalloocheenoo boonoshin wodiihe.

²¹ Doono Yeerin bi shoodoyich, ashi bushiishoyich bi tuniiti worganikkiti mooyoyich, galletebeete.

²² Galletee deejjoon biich giddiibeete; bi shuunoonoo emirikkiibeeti shoddoona geteete.

²³ Ikkikkeenaꞌo baharee toommona markaboona hammiyeete; boonoshi shuunoonoo aroochaa shuuneheete.

²⁴ Doono Yeerichi shuunoon beeggiyeete; worganeeti bi shuunoon baharoochaa beeggiyeete.

²⁵ Bi getaa yubee yongo tiyiye; aachi aayoo kaama phiceehe.

²⁶ Yubee yongo markaboon kaama phicehe; wochinnoonoo ceeni aachi dech kindiyeete; magge iritoona boonoshi shendoo oojjiye.

²⁷ Boonoshi aafo shaawee, masheti ashichoommon dadeddeheete; boonoshi ariyoo bulli duubehe.

²⁸ Aroochee boonoshi xuuxee aabooba Doono Yeer waan cookiyeete; biyoo boonoshi iritoochee boonoshin wodiihe.

²⁹ Yubee yongoon haweccaayiye; aachi aayonoo shashewaayiye.

³⁰ Eboshi shashewitoyich emiroona wucwucciyeete; boonoshi qaatiti aachi gocooch boonoshin deebiye.

³¹ Doono Yeerin bi shoodoyich ashi bushiishoyich bi tuniiti worganikkiti mooyoyich, galletebeete.

³² Iitee daggoochaa biin moogebeete; qaabbeenaꞌo kiceetoochaa biin galletebeete.

³³ Doono Yeeri aacinaꞌon barahoo, aachi tuneenaꞌonoo shuuꞌi showoo, tuniihe.

³⁴ Arooch koteti asheenaꞌochi xummittinee naboona qeemi showoon kiikki barahoo tuniihe.

³⁵ Barahoon kote aachi xaaꞌoo shuuꞌi showoonoo aachi tunoo, tuniihe.

³⁶ Shaacetinaꞌon arooch kotiihe; boonoshiyoo arooch beeya katemoon shuuneheete.

³⁷ Maayoon shookkiyeete; woyinoonoo bechiyeete; wodde maayoon qecciyeete.

³⁸ Boonoshin diiriye; oogichiꞌinoo meettiyeete; boonoshi gijjeenaꞌo meettemoyichoo tuniihe.

³⁹ Xuuxoona, iritoonaa ayinoona giishee boonoshi cooneehooba,

⁴⁰ iraasheenaꞌo toommooch yeelloon woniihe; gommo aalli barahooch boonoshi yallyallimemmoyich tuniihe.

⁴¹ Tunebaani girechinaꞌon neexxeyoochee kichiye; boonoshi gumbeenaꞌon bagee bushiishoochoommon meechiye.

⁴² Kaameenaꞌo ebin beegiree emiroona wucwuccemminaꞌone; gondo bi noonoon yechemmone.

⁴³ Ariyecho tuneto bulli ebi mooyon gabibe; Doono Yeerichi shoodoon shalligibe.