Shoddo 106 - Kafa Linguistics Project

Yeeri Bi Asheenaꞌoyich Deeyemmi Deꞌittino

¹ Haleluya! Deꞌo bi tunetoyich, Doono Yeerin galletebote; bulli yemeenooch shoodechone.

² Doono Yeerichi ooge shuunoon koni hakki getteehe? Bedoona biin galletoon hakkemmo konine?

³ Dayinneto dabaachemmoyich quyee beetinaꞌo, cadiqoon bulli aabooch tunii beetinaꞌo, diireetinaꞌone.

⁴ Doono Yeero, ne asheenaꞌon gaawe aafoona ne ciiniyooba taan gabibe; boonoshin ne wodiihooba taan qajjaahine.

⁵ Ebiyoo ne kaaccetinaꞌo gaannoon ta beeggemmoyich, ne asheenaꞌona tookki ta emiremmoyich, ne hajjee asheenaꞌona tookki oogoona ta bekkemmoyichiye.

⁶ No qaabbechinaꞌochoommon axaaxoon shuuneto noone; xuqqeto noone; gondeto noone.

⁷ No qaabbechinaꞌo Gibitsee showooch beebee, worganikkiti ne shuunoon shalligaaneenaꞌone; wodde ne shoodoon gabaaneenaꞌone; Ceelle baharoochaa ne toommooch tiyiyeete.

⁸ Tunebaani Doono Yeeri ooge bi hakkoon arichiyoyich, bi shigoyicha ii boonoshin wodiihe.

⁹ Ceelle baharoon bi noggetaa shuuqqiye; shuuꞌi showoona boonoshin yaabii kichiye.

¹⁰ Boonoshin shixxii beetinaꞌo kishoochee boonoshin wodiihe; boonoshi etteenaꞌo waanee boonoshin shiwee wodiihe.

¹¹ Aaco boonoshi etteenaꞌon qooxxiye; boonoshi etteenaꞌoochee ikkolla echeyaanoone.

¹² Aroochee bi qaaroon gibeneheete; galletee shoddoon biich shoddeheete.

¹³ Tunebaani bekkech bi shuunoon batteheete; bi ciicoonoo haaꞌii quyoon qajjiyeete.

¹⁴ Barahoochaa oogichii xiqqeheete; Doono Yeerinoo phireya tiyiheete.

¹⁵ Boonoshi echeton boonoshich immiye; tunebaani maajjiibeeti biiyoon boonoshi daggooch deejjiye.

¹⁶ Kaambooch beechii, Muusina, Doono Yeerich yaafeeti Haroonina, qanaateheete.

¹⁷ Ebich showoo haawutteꞌi Daataanin qooxxiye; Abiraamichi gumbeenaꞌonoo shicciye.

¹⁸ Boonoshi dabbeenaꞌo toommooch qaaqqoon kindiihe; qaaqqee aaxxo gondeenaꞌon michiye.

¹⁹ Kooreebaa aachoochee maamon shuuneheete; wociitaa shuuneeti misiloyich goyinneheete.

²⁰ Yeerichi oogee yiiroon, mocoon maabeeti gubbenoochi misiloona shaddiyeete.

²¹ Gibitsee showoochaa gaakkechi mooyon tuniiti, boonoshin wodiyechi Yeerin batteheete.

²² Kaamee showoochaa worganikkiti mooyon tuniiton, Ceelle baharoochaa keqqichiti mooyon tuniiton, batteheete.

²³ Boonoshin aalliyoochee bi kaaro wottemmoyich, bi kaacciti Muusi bi aafooch bi neexeyaan gaata, boonoshin aalliyesho bi tunoon gettiye.

²⁴ Aroochee shucheti showoon hoxeheete; gibenikkeeti bi qaaroon gibeneyaaneenaꞌone.

²⁵ Boonoshi duukkaani duukkaanoochaa guruuxiyeete; Doono Yeerichi qaaroon waayemmon qajjiyeete.

²⁶ Ebich barahoochaa boonoshin wuxemmo bi tunoonon, bi kishoon tiijjiꞌi wogehe.

²⁷ Boonoshi shiijjereenaꞌon aageteenaꞌo daggooch, boonoshinoo showee toommooch, shaccemmo bi tunoon wogehe.

²⁸ Aroochee Feꞌoori beeti Baꞌaalina tookkii yesheheete; qiteenaꞌoyich deejjeeti deejjoon maaheete.

²⁹ Boonoshi shuunoona Doono Yeeri kaaremmoyich tuniiheete; naxoo boonoshi toommooch waahe.

³⁰ Finihaasi tiyiꞌi gondeenaꞌon bi sheeraa, naxo neexehe.

³¹ Ebiyoo shiijjeroochee shiijjerooch bulli yemeenoon cadiqo tuniitaa biich haddeehe.

³² Meriibi aachi gashoochaa Doono Yeeri kaaremmoyich tuniiheete; Muusiyoo boonoshi naboona xuuxehe.

³³ Oogichii biin boonoshi caamiitoyich, bi noonoochee gonde mooyon kichiye.

³⁴ Doono Yeeri boonoshich gettitoommon, aageteenaꞌon aalliyaaneenaꞌone.

³⁵ Tunebaani aageteenaꞌona bacceeꞌi, boonoshi tuniitoommon tuniyoon doyiyeete.

³⁶ Boonoshich olloon tuneti, aageteenaꞌo shahalleenaꞌoyich maddeheete.

³⁷ Boonoshi anaami bushiishoonaa maache bushiishoonon, yinnoyich deejjiyeete.

³⁸ Boonoshi anaami bushiishoonaa maache bushiishoonon, Kanaanee shahalleenaꞌoyich deejjoona, xalle damoon ukkiyeete; showoo damoona eeꞌehe.

³⁹ Boonoshi shuunoona eeꞌeꞌi, Doono Yeerich gibeneyaaneenaꞌo tuneheete.

⁴⁰ Ebich Doono Yeeri kaaro bi asheenaꞌo toommooch aaxxehe; bi hajjee asheenaꞌonoo tiyaarehe.

⁴¹ Aageteenaꞌoyich beshiiꞌi immiye; boonoshi shixechinaꞌo boonoshin hajjiyeete.

⁴² Boonoshi etteenaꞌo boonoshin neexxii hajjiyeete; boonoshich hajjeeheete.

⁴³ Doono Yeeri meeti aaboon boonoshin wodiihe; tunebaani boonoshi bi toommooch tiyiyeete; boonoshi axaaxoona cooneeheete.

⁴⁴ Ebi tunetaanoona boonoshi cookoon bi waayehooba, boonoshi xuuxoon beeggiye.

⁴⁵ Boonoshich bi wogoon gabiye; beshaa beshe bi shoodoommona boonoshin ariqqehe.

⁴⁶ Boonoshin hajjii beetinaꞌo, boonoshich ariqqemmoyich tuniihe.

⁴⁷ No Nuggishoo Doono Yeero, noon wodiibe; ne shigoyich galletoon no giddiyemmoyich, yaafe ne shigoon no galletemmoyich, aageteenaꞌo daggoochee noon wochi deebe.

⁴⁸ Bulli yemeenoochee bulli yemeenooch, Israꞌeelee Nuggishoo Doono Yeeri diireebe! Asheenaꞌo bulliyoo, “Ameena” geteete. Doono Yeeri galleteebe!