Shoddo 105 - Kafa Linguistics Project

Yeerinaa Bi Asheenaꞌona

¹ Doono Yeerin galletebote; bi shigoonoo ceegote; bi tuniito bullinoo aageteenaꞌoyich arichiibote.

² Biich shoddebote; galletee shoddoon biich shoddebote; gaakkechi bi shuunoo bullinoo getote.

³ Yaafe bi shigoonoo geecibote; Doono Yeerin qaawiibeeti mullecho emiribe.

⁴ Doono Yeerin, bi kupphiyoonoo qaawibote; bulli aaboon biin qaawibote.

^5-6 Bi guuno Abrahami yareenaꞌote, bi kaacciti Yaaqobichi bushiisheenaꞌote, bi tuniiti worganikkiti bi shuunoon, bi nalloonaa gaakkechi bi mooyonon gabibote.

⁷ Doono Yeeri no Nuggishoone; showoo bulliich dayinnetoona nallii beetone.

⁸ Bi giyiti wogoon bulli yemeenooch, bi gettiti qaaroonoo hume shiijjerooch beddaahaa, batteyaache.

⁹ Abrahamina tookkii bi giyiti wogoon, Yisaaqich bi gibenikkiti gibenoon batteyaache.

¹⁰ Ebinoo Yaaqobich qociyoon, Israꞌeelichoo bulli yemeenee wogoon tuniiꞌi manjiihe.

¹¹ Ishichiinoo iye: “Kanaanee showoon neech immemmo taane; ne hajjoo tuniiree woraashemmo neene” iye.

¹² Haddoona giishecho tuneꞌi boonoshi beetaa, are showooch shiqqoo tuneꞌi boonoshi beetaa,

¹³ ikke showoochee bare showooch, ikke taatoo waanee bare taatoo waan yallyallimii boonoshi beetaa,

¹⁴ koniyoona boonoshin neexi hajjemmoyich daaggaanoone; boonoshi naboona taateenaꞌon kaarehe.

¹⁵ Ishichiinoo iye: “Huutteti ta asheenaꞌochi achooch shaggaahote; ta keemechinaꞌo toommoochoo gondoon shuuneyaahote” iye.

¹⁶ Showee toommooch shaacoon deebiye; boonoshi maayo bullin aalliihe.

¹⁷ Guuchittinooch kecheti Yooseefin boonoshiyee shiichiꞌi daachiihe.

¹⁸ Bi baateenaꞌo xuuree qoqqaannoona qoqqaanneheete; bi qettoochoo xuuree qoqqaannoo giyiye.

¹⁹ Shiichiꞌi bi gettito ceennimmi wottoon Doono Yeerichi qaaro biin phirehe.

²⁰ Taatoo wochiiꞌi biin biichiihe; macceenaꞌochi taatoo biin gawukkiye.

²¹ Bi kechi toommooch doono, bi yaapho bulli toommoochoo ukkiroo biin tuniihe.

²² Taatoochi iraasheenaꞌon bi daaggoona bi yaabemmoyich, bi mikkirechinaꞌoyichoo ariyoon bi dojjemmoyich, ukkiriihe.

²³ Israꞌeeli Gibitsee showooch hammiye; Yaaqobiyoo Kaamee showooch iibboo tunehe.

²⁴ Doono Yeeri bi asheenaꞌon aafiihe; boonoshi etteenaꞌoyee beshe hakkechinaꞌon tuniihe.

²⁵ Bi asheenaꞌon Gibitseenaꞌo shixxemmoyich, bi guuninaꞌon boonoshi maremmoyich tuniihe.

²⁶ Bi guuno Muusinaa bi kaacciti Harooninon deejjiye.

²⁷ Boonoshiyoo, Yeerichi malletoon Gibitseenaꞌo daggooch, gaakkechi mooyonoo Kaamee showooch tuniiheete.

²⁸ Manderoon deejjiꞌi showoo manderemmoyich tuniihe; tunebaani Gibitseenaꞌo bi qaaree toommooch tiyiyeete.

²⁹ Boonoshi aacinaꞌon damoo tuniihe; boonoshi haashoo qitemmoyich tuniihe.

³⁰ Woqqeqqo boonoshi showooch, boonoshi taateenaꞌochi gatooch beddaahaa ceenniye.

³¹ Bi getaa, gamoo waahe; shunnoo boonoshi showoon tuqqiye.

³² Boonoshi amiyon baderoo tuniihe; xeeyo boonoshi showooch xeejjiye.

³³ Boonoshi woyinoonaa boonoshi balaasoonon yexxiye; boonoshi showeexi mixinaꞌon tiichiye.

³⁴ Bi getaa gechoo, haddoyee beshiti gurimaashe gechoo, waahe.

³⁵ Showee toommeexi bechoo bullin aalliihe; boonoshi showeexi maayi aafoon maahe.

³⁶ Boonoshi showeexi gutenee bushoo bullin, batti batti boonoshi giidoo tuneto bullin, wuxiye.

³⁷ Israꞌeeleenaꞌo aachoonaa birewoonon yeshiree kechemmoyich tuniihe; boonoshi daggoochee taahiꞌi kuxee echeto aalloone.

³⁸ Israꞌeeleenaꞌoyich oogichii boonoshi shattitoyich, Israꞌeeleenaꞌo keyona Gibitseenaꞌo emiriyeete.

³⁹ Boonoshin qeroyich Yeeri quboon qubiihe; xumoona bi bekkemmoyichoo qaaqqoon qanniihe.

⁴⁰ Boonoshi echetaa shewekkeenaꞌon deejjiye; koshon shimaayoochee deejjiꞌi boonoshin michiihe.

⁴¹ Xaqqoon bi gaahaa aaco xuupphiye; woce aacochoommon barahooch wocciye.

⁴² Ebiyoo bi guuno Abrahamich bi gibenikkiti yaafe gibenoon bi gabitoyichiye.

⁴³ Ebich bi asheenaꞌon emiroona, bi kaaccitonoo ililoona yaabii kichiye.

⁴⁴ Bare asheenaꞌo showoon boonoshich immiye; boonoshiyoo bare macceenaꞌochi aayon woraashiyeete.

⁴⁵ Ebiyoo bi qociyeenaꞌon boonoshi quyemmonaa bi sheereenaꞌon boonoshi ceechemmonoyichiye. Haleluya!