Shoddo 104 - Kafa Linguistics Project

Hallitoyich Giddeebeeti Galleto

¹ Ta kasheene, Doono Yeerin diiribe! Ta Nuggishoo Doono Yeero, ne am shaahe oogoo neene! Oogee yiiroonaa oogoonon taheto neene.

² Bekkoon tahoochoommon taheto neene; shimaayoonoo duukkaanoochoommon yaggito neene.

³ Dambee aachi toommooch ne kexon haggeto neene; quboon ne gaari tuniihine; yongi qoshoona hammaabeeto neene.

⁴ Yongoon ne wocheeyechon, conjiibeeti qaaqqoon ne maddechon tuniihine.

⁵ Showoon bi tuugee toommooch manjiihine; ebich ciroona shuuraache.

⁶ Aacon tahoochoommon showooch tajjihine; aacinaꞌoo guudinaꞌo toommooch neexeheete.

⁷ Aacon ne noggetaa woccii aallehe; ne gigee qaaroon waayeꞌi kaatee wocciye.

⁸ Guudi toommonaa bambeenaꞌonon besheꞌi, boonoshich ne qanniiti xaaꞌooch wocciyeete.

⁹ Besheree showoon wochinnoon boonoshi qooxaachemmoyich, daaroon geddehine.

¹⁰ Aachi xuupheenaꞌo bambooch xuupphiyee, guudinaꞌo daggoona boonoshi woccemmoyich tuniihine.

¹¹ Ebina kubbi cooxinaꞌo aacon uchiyeete; kubbi kureenaꞌo boonoshi shachewoon kuxxiyeete.

¹² Are aachi gasheexi mixinaꞌooch shimaajji kafeenaꞌo gafiyeete; aroochaanoo shoddeheete.

¹³ Gumoochee amiyon guudinaꞌooch dichihine; ne kishee shuunoona showoo michiye.

¹⁴ Gijjeenaꞌoyich mocoon colliihine; maayoon showoochee danoyich, asho becheenaꞌon bi shiimemmoyich tuniihine.

¹⁵ Ashi mulloon emirikkiibeeti woyinoon, achoon pherphelliibeeti huutoon, kupphiibeeti maayoon qanniihe.

¹⁶ Doono Yeerichi mixinaꞌo, bi bechiti Libanoosi yigeenaꞌo bede amiyon daneheete.

¹⁷ Kafeenaꞌo arooch boonoshi kexon haggiyeete; maannaakkeenaꞌo ciidee mixinaꞌooch boonoshi beemi xaaꞌoon qanniiheete.

¹⁸ Ogooge guudinaꞌo barahee emmisheenaꞌoyich xaaꞌoon, xaqqee googininaꞌoo ukkecheyich xaaꞌoon tuneheete.

¹⁹ Agene gooroon bi malletemmoyich, aabeyoo bi giyemmi saatoon bi ariyemmoyich, tuniihine.

²⁰ Ne, manderoon hallihine; ebiyoo xumo tunehe; kubbi cooxinaꞌoo manderoona kechiyeete.

²¹ More daahereenaꞌo boonoshi maayemmon yecha gigeheete; Yeer waaneenoo boonoshi maayoon qaawiyeete.

²² Aabo kechimmona wotteheete; boonoshi gofooch tokketeheete.

²³ Asho bi shuunooch hammiye; xumemmi wottoon arooch heechiye.

²⁴ Doono Yeero, ne shuunoo am shaahe woddoone! Bullin ne ariyoona shuuneto neene; ne halliti mooyo showoona ceennitone.

²⁵ Ogoogoonaa gishiishoona tuneti haddoyee beshe halleenaꞌo arooch beeti, oogetonaa gaminoona tuneti baharo ebiyoche.

²⁶ Aree toommona markabeenaꞌo hammii beetinaꞌone; ne halliti Lewataani aroochaa kaachii beetone.

²⁷ Maayoon bi gooroona ne immemmoyich, eboshi bulli neen gibenee beetinaꞌone.

²⁸ Boonoshich ne immemmona maaheete; ne kishoon ne yaggenoo michiyeete.

²⁹ Boonoshiyee ne barimmona keqqiyeete; boonoshi hiinnoon ne daammemmona qitiyeete; boonoshi halleeti showa wotteheete.

³⁰ Ne Ayaanoon ne deejjaa halleeheete; showoyichoo andire kashoon immehine.

³¹ Doono Yeerichi oogo bulli yemeenoon manji beebe; Doono Yeeri bi shuunoona emiribe.

³² Showoon bi ciinaa qewehe; guudinaꞌon bi yeshaa cufiyeete.

³³ Ta kashee yemeenooch Doono Yeerich shoddemmo taane; ta beeti yemeenooch Yeerin galletemmo taane.

³⁴ Doono Yeerina ta emiroommon biyoo ta gaboona emiribe.

³⁵ Axaaxechinaꞌo showoochee aallebeete; gondeenaꞌo ebiyee bekk beeyaayeete. Ta kasheene, Doono Yeerin diiribe. Haleluya!