Shoddo 103 - Kafa Linguistics Project

Yeerichi Shuno

Daawitichi shoddo

¹ Ta kasheene, Doono Yeerin diiribe! Ta ashittino bulli yaafe bi shigoon diiribe.

² Ta kasheene, Doono Yeerin diiribe! Bi gaacoonoo batteyaahine.

³ Ne axaaxoo bullin maariibeeto ne biiyo bullin wodiibeeto,

⁴ maash hamoochee neen shiweebeeto, bi shoodoonaa bi ariqqoonon gubbichoochoommon neech ukiibeeto,

⁵ booyochoommon ne gurimaashittino bi andiremmoyich, gaawe mooyon imona ne qaatoon ceechiibeeto, biine.

⁶ Doono Yeeri cadiqittinoona shuunehe; xukketinaꞌo bullich dayinnetoona nalliye.

⁷ Bi gommon Muusi ariyemmoyich, bi shuunoon Israꞌeeleenaꞌo ariyemmoyich, tuniihe.

⁸ Doono Yeeri maarechonaa ariqqechonane; kaaroyich nibbechonaa wodde shoodechonane.

⁹ Bulli aaboon kaareyaache; bi kaaroo bulli yemeenoon yagaache.

¹⁰ No axaaxoommona noon naxeyaanoone; no gondoommona nooch qocaanoone.

¹¹ Shimaayoo showoochee damba wohoommon biin shattii beetinaꞌoyich bi shoodo oogetone.

¹² Aabi-keyo aabi-gimoochee wohoommon no axaaxoon no waanee wokkiihe.

¹³ Nihoo bi bushiishoyich bi ariqqoommon, Doono Yeeri biin shattii beetinaꞌoyich ariqqehe.

¹⁴ Amoochee no shuuneeto gaata bi arii beetone; showoo no tunoonoo gabii beetone.

¹⁵ Ashi yemeeno mocoommone; gaddeexi mocoochoommon bungiye.

¹⁶ Yongo yongemmona bekkech aallehe; bi xaaꞌolla aricheyaache.

¹⁷ Tunebaani Doono Yeerichi shoodo biin shattii beetinaꞌoyich bulli aaboochee bulli aaboochiye; bi cadiqittinoo bushaa bushooch beddaahaa boonoshi toommoochiye.

¹⁸ Ebiyoo bi wogoon quyee beetinaꞌonaa bi getoon ceechii beetinaꞌonochi toommoochiye.

¹⁹ Doono Yeeri bi taatee qeenon shimaayooch manjiitone; bi taatittino bullin hajjemmone.

²⁰ Bi qaaroonoo ceechiibeeti, bi gettii beeton waayaabeeti, hakkechi maraakeenaꞌote, Doono Yeerin diiribote.

²¹ Biich maddeebeeti, bi daaggoon ceechiibeeti shimaajji halleenaꞌote, Doono Yeerin diiribote.

²² Bi taatee showoo bulliich beeti, bi halleenaꞌote, ittoshi bulli Doono Yeerin diiribote. Ta kasheene, Doono Yeerin diiribe.