Shoddo 102 - Kafa Linguistics Project

Iritee Daggooch Beeti Ashi Corooto

Ayiniꞌi Doono Yeeri biin gaachemmoyich corootiibeeti duꞌeti ashi corooto

¹ Doono Yeero, ta corootoon waayebe; ta cookoo ne waan shage.

² Ta xuuxee aabooba ne aafoon badd wochiyaahine; ne waamon ta waan gaꞌiibe. Ne waan ta cookiyooba, kaateree waayebe.

³ Ta yemeeno cufoo aalloommon aallehe; ta shaawushoo qaaqqee bunoochoommon gaamiye.

⁴ Gacheti mocoo shoolloommon shoollito taane; maayo taan shaatiye.

⁵ Oogichaa ta gaashiroochee tiyitona, shaawushoo kecheto taane.

⁶ Baraheexi aakkoonaa one kexooch beeti yuyeenon shaahiyoye.

⁷ Tokketoo ta aafoochee aallehe; kechi toommooch beeti, guuphoochee kuxeti kafoon shaahiyoye.

⁸ Heeyo bullin ta etteenaꞌo taan giishiiheete; taan coonee ta shigoona maxxaareheete.

⁹ Tulloon maayoochoommon maahoye; ta acimoonoo ta uyoona bacciyoye.

¹⁰ Ebiyoo ooge ne kaaroochee tiyitona taan tiijjaa ne awuretoyichiye.

¹¹ Ta yemeeno womikkee yiirittoommone; tawoo mocoochoommon shoolliyoye.

¹² Tunebaani Doono Yeero, ne, bulli yemeenoon taataꞌa beehine; ne shigo shiijjeroo bulliich beehe.

¹³ Hini, Tsiyooni gaawe aafoona ciichemmi yemeenoone; maacheti aabo shaggitone; tiyiree Tsiyoonich ariqqebe.

¹⁴ Ebiyoo bi xaqqeenaꞌo ne guuninaꞌona shuchetinaꞌo, bi butteenaꞌoo boonoshich aaxxeenaꞌo, boonoshi tunetoyichiye.

¹⁵ Aageteenaꞌo Doono Yeerichi shigoon, showee toommeexi taateenaꞌo bulliyoo bi oogee yiiroon, shattiyeete.

¹⁶ Ebiyoo Doono Yeeri Tsiyoonin wochi shuunemmo, bi oogoonoo bekkemmo bi tunetoyichiye.

¹⁷ Duꞌetinaꞌochi cookoon waayemmone; boonoshi qolloonoo hoxeyaachemmone.

¹⁸ Doono Yeerin boonoshi galletemmoyich, woyemmi shiijjeroyich ebin kooribe.

¹⁹ Doono Yeeri damba yaafe bi xaaꞌoochaa ciinniye; shimaayoochaa showooch ciinniye.

²⁰ Ebiyoo, qoppeenaꞌochi gaashiron waayoyich, qitooch nalleetinaꞌon biichii gawukkoyichiye.

²¹ Ebich Doono Yeerichi shigo Tsiyoonaa awaajjeyemmone; Yerusaalemaanoo galleteyemmone.

²² Ebiyoo macceenaꞌonaa taatee showeenaꞌona Doono Yeerich goyinneya kiceehoobane.

²³ Ta gurimaashittinoochaa ta giidoon tiichitone; ta eenonoo qamichitone.

²⁴ Tawoo “Ta Nuggishoocho, ta eeni gutte daggoochaa taan daammaahine; ne yemeeno shiijjeroochee shiijjerooch bedoone.

²⁵ Ne, wonnee tiijjaꞌa showoon heccehine; shimaayoo ne kishee shuunoone.

²⁶ Boonoshi bulliyoo aallemminaꞌone; tunebaani ne beeyemmo neene; boonoshi bulliyoo qoreddoochoommon geenemminaꞌone; geeneti tahoochoommon shaddemmo neene; boonoshiyoo aallemminaꞌone.

²⁷ Tunebaani ne halla neene; shaddeyaachine; ne beemi yemeenoyich ciiro aalloone.

²⁸ Ne maddechinaꞌochi bushiisheenaꞌo diggoona beeyemminaꞌone; boonoshi shiijjeroo ne aafooch manjiree beeyemmone” iyo.