Shoddo 10 - Kafa Linguistics Project

Dayinnetoon Danoyich Corooteeti Corooto

¹ Doono Yeero, wokkaa ne neexaabeeto amoyichiye? Xuuxee aabooba ne aashaabeeto amoyichiye?

² Gonde asheenaꞌochi geecee naboona girechinaꞌo yookkeheete; boonoshi olleti olloona yechebeete.

³ Gonde asho bi mullee qaatoona cooddiye; hiriggechi asho Doono Yeerin shixxii uppiye.

⁴ Gonde asho bi geecoochee tiyitona Doono Yeerin aaxxiyaache; biyoo “Yeeri aalloone” iꞌi gabiye.

⁵ Bi gommo bulli aaboon biich kaamehe; aabichaa ne nallaabeeto gaatoo shalligaache; bi etteenaꞌo bullinoo cooqqiriye.

⁶ Bi mulloonoo ishichiꞌi gabiye: “Hiniichee shuuraachemmo taane; shiijjeroochee shiijjerooch beddaahaa, iritoo ta toommooch shagaachemmone” iye.

⁷ Bi noonooch ufo, kootoonaa miichoona ceennitone; maroonaa gonde mooyona bi heciyooch beetone.

⁸ Gafee gaꞌooch ottii quyehe; aashe xaaꞌoochaa xalle asheenaꞌon wuxiye; hakka guutoon qayee beehe.

⁹ Kubbooch daaheroochoommon ottii quyee beehe; girechon yeshoyich quyehe; girechonoo gaappee yechiꞌinoo bi dabboona geechiye.

¹⁰ Gaachaallo yiikkeehe; dugilla goobehe; bi mochee dechiich dihiye.

¹¹ Biyoo bi mulloona, “Doono Yeeri battetone; bi aafoon bi qeritoyich, ciinaachemmone” iye.

¹² Doono Yeero, tibe; Nuggishoocho, ne mochoon tiijjibe; degaalleenaꞌon batteyaahine.

¹³ Axaaxecho Doono Yeerin oogiyoo amoyich qajjiye? Amoyich bi mulloona, “Doono Yeeri taan naxeyaachemmone” iye?

¹⁴ Tunebaani ne, ne kishoona gatiyoon qocoyich, ashi xuuxoonaa ayinoonon beeggaabeeto neene; girecho bi qelloon neech aderehe; newoo nihaalloyich gaachoo neene.

¹⁵ Axaaxechonaa gondoonochi kishoon tiishe; wochinnoon gondoon bi shuuneyaachemmoyich tuniiree, bi gonde shuunoyich biin naxebe.

¹⁶ Doono Yeeri bulli yemeenoochee bulli yemeenooch Taatoone; aageteenaꞌo bi showoochee aallemminaꞌone.

¹⁷ Doono Yeero, boonoshi qelloon giishiitinaꞌochi qolloon waayehine; ne waamon gaꞌiyaa waayaꞌa boonoshi mulloon kupphiihine.

¹⁸ Meenon taheti asho illa boonoshin bi shatiyaachemmoyich, nihaalleenaꞌonaa xukketinaꞌonoyich taggehine.