Shaahiyoo 9 - Kafa Linguistics Project

Shalligee Qanniiti Gifirooch Tuusheenaꞌo Atalleyoo

¹ Shalligee shabaatte giimboon xaraa qanniyaꞌa bi kexon haggahan.

² Maaꞌoon bashiyan; woyinee uyoon duuchahan; maayi madoonoo qanniihan.

³ Katemee xoobeenaꞌoochaa ishichi boonoshi ataallemmoyich bi gonneenaꞌon wochaa daachiyaꞌa,

⁴ “Tuusheenaꞌote, hach wobote” iyan. Mullaalleenaꞌonoo ishichiyan:

⁵ “Waaree ta maayoon mamote; ta duucheti woyinee uyoonoo uyote.

⁶ Tuushoo tunoon qayote; kashoonoo beebote; shalligee gommonoo hambote” iyan.

⁷ Cooqqirechon kaaree ciiccimmo naagoon danemmone; gonde ashoon noggemmo cooneyoon danemmone.

⁸ Cooqqirechon kaareyaahine; neen shixxemmone; mullechon kaarebe; neen shunnemmone.

⁹ Mullechon dojjibe; shalligoon daakkemmone. Cadiqe ashoon dojjibe; ariyoon daakkemmone.

¹⁰ Doono Yeerin shato shalligee shiichoone; Yaafoon ariyoo goomone.

¹¹ Taanna ne eeno genjemmone; natinaꞌo ne eenooch daakkeyemminaꞌone.

¹² Mullecho ne tunegaata, bi gaaccemmo neeniye; cooqqirecho ne tunegaata, bi gondemmo neech baachiye.

¹³ Mullaalli maachee cookechine; amoonolla ariyaani baalleene.

¹⁴ Bi kechi kellooch kotahan; katemee xooboochoo kotahan.

¹⁵ Aroona beshaa beetinaꞌon, boonoshi gommon hammii beetinaꞌon, ishichaa ceeggahan:

¹⁶ “Tuushe asho ta waan wobe” iyan. Mullaalleenaꞌonoo ishichiyan:

¹⁷ “Gaayaa ucheebeeti aaco shaawone; aashoochaa manjeebeeti maayo emirikkii beetone” iyan.

¹⁸ Tunebaani boonoshi, qite asheenaꞌo arooch beemon, bi ataalliti asheenaꞌo, maash boonoshi gimon ariyaaneenaꞌone.