Shaahiyoo 8 - Kafa Linguistics Project

Shalligeen Naadoo

¹ Shalligee ceeggaa beetaachane? Gabeyoo cookaa beetaachane?

² Gommi gasheexi xoobooch, wotte kaattooch neexaa beetine.

³ Katemooch gimi kellee gaꞌoochaa ishichaꞌa cookaa beetine:

⁴ “Asheenaꞌote, ittoshin ceeggaabeeti taane; ashi bushiisheenaꞌo waanoo cookaabeeti taane.

⁵ Hini tuusheenaꞌote, acon doyibote; mullaalleenaꞌote, mullechon tunebote.

⁶ Aafechi mooyon yibbaatemmi ta tunetoyich ellebote; kaame mooyo ta noonoochee kechemmone.

⁷ Iberoon yibbaateebeeti taane; ta noonoo gonde mooyon yibbaatoon ciigehe.

⁸ Ta noonoochee kechiibeeti qaaro bulli iberoone; xummoo woyee wuuqqoo toonoone.

⁹ Shalligechoyich, bulliyona kaamoone; ariyechi ashoyichoo tatoone.

¹⁰ Birewoyee ta ciicoon deꞌote; xalle aachoyee ariyoon kaacote.

¹¹ Shalligee ceelle inqoyee besheene; ittoshi qaatiibeeti mooyo aabiyona biinna tatoon hakkaache.

¹² “Shalligee ta, acona koteti taane; ariyoonaa gaawe gaboonon daneti taane.

¹³ Doono Yeerin shato gonde mooyon shixone; ta, geecoonaa coodonon shunaache; gonde gommonaa xumme yibbaatoonon shixxehoye.

¹⁴ Ciicoonaa gaawe shalligoona taach beetone; gaawe gaboo taach beetone; giidoo taach beetone.

¹⁵ Taateenaꞌo taateebeeto taannane; iraasheenaꞌo tate nalloon nalliibeeto taannane.

¹⁶ Woraaferasheenaꞌo yaabii qeejjiibeeto taannane; iraasheenaꞌo showoon qeejjiibeeto taannane.

¹⁷ Taan shunnii beetinaꞌon shunnehoye; kupphiiꞌi taan qaawii beetinaꞌo taan danemminaꞌone.

¹⁸ Gaannoonaa oogoona bi beeto ta waaniye; abbetechi adduunoonaa beemi gaawoona taachone.

¹⁹ Ittoshich ta immaabeeti mooyo, xalle aachoyee, xure birewoyeenoo beshe aaxxoone.

²⁰ Ta shaꞌaabeeto cadiqee gommonane; ta boocho dayinnetee boochoone.

²¹ Taan shunnii beetinaꞌoyich, gaannoon immemmi taane; boonoshi ginjabeetoonoo ceechemmi taane.

²² “Doono Yeeri, batti batti bi shuunoyee aaf, bulliyee shiichiꞌi taan halliye.

²³ Batti batti showoo halleyoyee shiichaꞌa, wonnee wonna halleehoye.

²⁴ Aachi xuupheenaꞌo xuuphoyee, waarwaare aaco danoyee shiichaꞌa shiijjehoye.

²⁵ Guudinaꞌonaa geppeenaꞌona, halleyoyee shiichaꞌa shiijjehoye.

²⁶ Doono Yeeri showoon bi halloyee aaf, batti batti buttoon bi halloyee aaf, shiijjehoye.

²⁷ Shimaayoon Doono Yeeri yaggiyooba, waarwaare aaconaa gumoonochi danoon bi daarehooba, arooch beeti taane.

²⁸ Quboon damba gumooch bi kotiihooba, waarwaare aachi tunoon bi qechiyooba,

²⁹ baharoyich gaagemoon bi geddiyooba, aacinaꞌo bi getoyee besheyaachemmoyich, showee kotoon bi hecciyooba,

³⁰ ebiyooba bi gaꞌoochaa shuunoyich aafo taane; qemi qemona biin emirikkaa beeho; bulli aaboon bi aafoochaanoo emiraa beeho.

³¹ Bi halliti alemoona emiraa beeho; ashi bushiisheenaꞌonoo emiraa beeho.

³² “Ta bushiisheenaꞌote, andoo ta waanee ellebote; ta gommon dabbii beetinaꞌo diireetinaꞌone.

³³ Ta dojjaa beeton waayebote; mullechon tunebote; beeneyaahote.

³⁴ Ta waanee waayeebeeti asho, qemi qemona ta kellooch daneebeeti, ta kellee gaꞌooch taan quyeebeeto, diireetone.

³⁵ Taan daneto kashoon danehe; Doono Yeeriyoo biin gaawe aafoona ciinnemmone.

³⁶ Tunebaani taan mucceto bi qellich gondiihe; taan shixxiibeeto bulli, qitoon shunniye” iyane.