Shaahiyoo 7 - Kafa Linguistics Project

¹ Ta bushoocho, ta qaaroon waayebe; ta geteenaꞌonoo ne mullooch kotiibe.

² Ta geteenaꞌon quyeree kashoona beebe; ta sheeroonoo ne aafee aachoochoommon quyebe.

³ Eboshin ne kishee yapherooch gede; ne mullee cilloochoo kooribe.

⁴ Shalligoon “Ta manee neene” gete; ariyoonoo “Ta katini xibeene” geti ceege.

⁵ Eboshi shunimaayee waanee, noonoo nooccaabeeti ashi mechee waanee neen quyemminaꞌone.

Yahechi Ure Mooyo

⁶ Ikke areddoon, ta kechi mallee kelloonaa maach ciinnaa beeho.

⁷ Tuusheenaꞌo daggoochee, gurimaasheenaꞌo daggoocheenoo mullaalli ikke gurimaashoon beeggeho.

⁸ Ikke ureechi kexo waan daammiibeeti wotte kaattoona beshee beehe.

⁹ Ebiyoo showoo xumeꞌi mandereti saatoochiye.

¹⁰ Aroochee ikke ure biinna danahan; areyoo yahechi ure tahaa beetoommi tahoon tahetine; muriciyoyichoo gabaꞌa kechetine.

¹¹ Cookechi yeellaalli ureene; kexooch heeyaani baatechine.

¹² Biyoo ikkoochaa gommooch, ikkoochaa gabiyee godooch, beshe kaattoo bulliich ottaa beetine.

¹³ Ebi gurimaashoon oppaa gaappaachaa shummahan; yeelleyaanoonoo ishichiyan:

¹⁴ “Deejjoon giddiiyeshi ta aahee, hanaach ta tiikkeshoon ceechiti taane.

¹⁵ Ebich neenna daneya kechehoye; kupphiyaꞌanoo neen qaawiyoye; ebiyoche and neen daneti taane;

¹⁶ Gibitsee waati macecikkiti tahoon ta qeenooch yaggiti taane;

¹⁷ ta qeenoochoo hareboochee, ereetoonaa qarefoonoochee shuuneeti shittoon wuciti taane.

¹⁸ Ne waataa harimmi wottoon shunoon mamone; shunoon mamonoo emiribone.

¹⁹ Ta keno kexooch aalloone; wohi gommon shaꞌetone.

²⁰ Gijjoon kolloona yechii bi hammitoyich, gutte shabaattoyee hach wotteyaachemmone” iyan.

²¹ Wodde tappaashoona biin muriciihan; shaawi bi yibbaatoonoo biin dawushiyan.

²² Gattoo bi guureyemmi xaaꞌooch hamoommon, boyijjo afaafinoona kambooch bi gimoommon, biyoo bekkech areen dabbiꞌi hammiye.

²³ Shango bi qamooch kochitoommon tunehe; kambooch giyeti kafeen shaahiye; ebich bi qoccemmi gatiyoo bi kashoon bi tunoon ariyaanoone.

²⁴ And illa ta bushiisheenaꞌote, ta waanee ellebote; ta noonoochee kechiibeeti qaaroon gaawichi waayebote.

²⁵ Ittoshi mulloon bi gommo waan gaꞌiyaahote; bi gommon dabboona muriccaahote.

²⁶ Kochaa bi dichitinaꞌo meetinaꞌone; bi wuxitinaꞌoo mattiqutteenaꞌone.

²⁷ Bi kexo maash daammiibeeti boochoone; qite asheenaꞌo beeti gatooch kindii beetone.