Shaahiyoo 6 - Kafa Linguistics Project

Daakkaa Icheti Ciico

¹ Ta bushoocho, ne giyoyich buushaaroo ne tunegaata, dallaawe ashich, kishoon tappaꞌa ne wogegaata,

² ne getteti qaaroona, ne noonoochee kechiti yibbaatoonoo yechetine getone.

³ Ta bushoocho, ne qelloon wodiyoyich ebin tuniibe: Ne giyoo kishooch ne dihitoyich, afaafinoona hami buushaarittinoochee neen bi kichemmoyich qollebe.

⁴ Ebin ne tuniyaanoon tokketoo ne aafooch shaggaaye; ne qillifoonoo maggaaye.

⁵ Xiixxee aaddoo kishoochee, kafee kamboochee bi muricoommon newoo ne qelloon wodiibe.

⁶ Hini beenechocho, akkaashoo waan hambe; bi gommon beegiree mullechon tunebe.

⁷ Ukkiroo, iraashoonaa doonona boonoshich aalloone.

⁸ Tunebaani qaawooba boonoshi maayoon qanniiheete; marehooboo boonoshi maayoon kiciyeete.

⁹ Hini beenechocho, tokkete ne beeyemmo aati wottooniye? Geepphiroochee ne tiyemmo aatane?

¹⁰ Giishechoon tokkete, giishechoon geepphiri, ne kishoon qodiree giishechoon kashe ne beetaa

¹¹ illa giroo bokkoochoommon, mucco goraadoon cuyeti ashichoommon, ne toommooch woyemmone.

¹² Gaacaalli gonde asho guudiiꞌi mooyon xummii yibbaatehe.

¹³ Bi aafoona xayishiye; bi baatoonoo malletehe; bi kishoonoo kochii bekkiihe.

¹⁴ Xummittino bi mullooch beetone; gondoon tuniyoyich bulli aaboon gabiye; kaaroon booddiye.

¹⁵ Ebich aallo diqqoona bi toommooch shaggemmone; diqqoonoo tiishemmone; wodoonoo hakkaachemmoone.

¹⁶ Doono Yeeri shixxiibeeti shiritte mooyo beete; shabaatte mooyonoo oogichiꞌi ciigehe; eboshiyoo,

¹⁷ geecechi aafo, koottiibeeti heciyoo, xalle damoon ukkiibeeti kishoo,

¹⁸ gondoon gabiibeeti mullo, gondooch afaafinoona wocciibeeti baatoo,

¹⁹ kootoon yibbaateebeeti koote miixoonaa, manaamaneenaꞌo daggooch hayoon booddiibeeti ashoononiye.

Yahechi Maachee Waanee Woho

²⁰ Ta bushoocho, ne nihoochi getoon waayebe; ne indee neech dojjitonoo batteyaahine.

²¹ Bulli aaboon ne mullooch kotiibe; ne qettoochoo tifebe.

²² Eboshiyoo ne hammaa beegaata, neen yaabemminaꞌone; ne qeyaa beegaata neen quyemminaꞌone; ne tiyemmonoo neenna yibbaatemminaꞌone.

²³ Geto ceechoone; doyoo bekkoone; kaaree sheeroo kashee gommone.

²⁴ Ebiyoo gonde maachee waanee, noonoo nooccaabeeti ashi mechee waanee neen quyemmone.

²⁵ Bi malletoon ne mulloona qaatiyaahine; aafee xayishoona neen bi yechemmoyich tuniyaahine.

²⁶ Ikke kochi gatiyoona asho yahechi ureen danoon hakkiye; tunebaani ashi mecheen qaawoo kashee gatiyoon qochiihe.

²⁷ Bi sheenooch qaaqqoon tiqqeechi bi taho micaachemmo konine?

²⁸ Qaaqqee bunee toommona hamibee, bi baatoo micaachemmo konine?

²⁹ Ashi mecheen qaawiibeeti asho bulli ebiyoommone; aree waan shaggimmo bulli sheeroochee muricaachemmone.

³⁰ Gaayo shaaceꞌi bi shaacoon wochoyich bi gaayigaata, asheenaꞌo biin hoxeyaacheete.

³¹ Tunetaa bi yechegaata, shabaatte kishoon qoccemmone. Bi kexooch beeto bullin immemmone.

³² Tunebaani shaddiibeeti asho qellaalli ashoone; ebin tuniibeeto bi kashoon aalliyemmone.

³³ Cooneyoonaa xooppeyoona bi toommooch shaggemmone; bulli aaboon yeelle beeyemmone.

³⁴ Qanaato kenoochi kaaroon booddemmone; nichoon bi wochii beehooboo ariqqeyaachemmone.

³⁵ Amee nummoonona deꞌon qaawaachemmone; wojjee woddoo bi ippoon aqqaayaachemmone.