Shaahiyoo 5 - Kafa Linguistics Project

Shunimaayee Waanee Woho

¹ Ta bushoocho, ta shalligoon ellebe; ne waamonoo ta gaboo waan gaꞌiibe.

² Ebiyoo gaawe gabecho ne tunemmonaa ne noonoo ariyoon bi yibbaatemmonoyichiye.

³ Shunimaayee noonoochee eeyo cottii beetone; bi yibbaatoo zayitoyee beshe aniꞌoone.

⁴ Tunebaani ciiroochaa ereetoochoommon caammemmine; gutte baddaa gayireeti goraadoommine.

⁵ Bi baateenaꞌo qitooch kindii beetinaꞌone; bi shaaddeenaꞌo shiwerooch daammii beetinaꞌone.

⁶ Kashee gommon aaxxiyaaneene; bi gommo xummoone; tunebaani ebi biich aricheyaanoone.

⁷ And ta bushoocho, ellebe; ta noonoochee kechiibeeti qaaroyee wokkaahine.

⁸ Ne gommon ebi ure waanee wokkiibe; bi kechi kellee gaꞌoona besheyaahine.

⁹ Ebiyoo ne oogoon baroyich, ne eenonoo ariqqaalleenaꞌoyich beshiiree ne imaachemmoyichiye.

¹⁰ Wottoo dallaaweenaꞌo ne gaannoona miyaachemmoyich, ne aajjetoo bare ashi kexooch bi giyaachemmoyichiye.

¹¹ Ciiroochaa ne meenonaa ne ashittinoona ciirehooba gaashillemmo neene.

¹² Ishichishoo gettemmo neene: “Aabichaꞌa sheeroon shixxehote? Ta mullo aabichiꞌi kaaree ciicon hoxehe?

¹³ Ta dojjechinaꞌochi qaaroon waayeyaano taane; boonoshi ciico qannoo ta waamon gaꞌiyaano taane.

¹⁴ Ebich iitoo kiceetoochaa waacha aallehote” gettemmo neene.

¹⁵ Ne hajjee oppeexi aacon ne uyoommon, ne hajjee mecheen baach shune.

¹⁶ Ne tuneenaꞌo gaddooch, ne aacinaꞌo addibaabooch ufo qaawiyaache.

¹⁷ Neech baach tunebeetani neenna tookkii beeti dallaaweenaꞌoyich tunaayeete.

¹⁸ Ne tunoo diireeto tunebe; ne bushittinee mecheena tookki emiribe.

¹⁹ Shuchiyaabeeti doollechoommon, malletechi xiixxechoommon, bulli aaboon bi xano neen digaayiibe; bi shunoonoo bulli areddoon miye.

²⁰ Ta bushoocho, shunimaayeen ne shunnaabeeto amoyichiye? Bare ureen ne tiqqaabeeto amoyichiye?

²¹ Doono Yeeri aafoochaa ashi gommo bulli xalla bekketone; biyoo ashi shaaddo bullin ciinnii beetone.

²² Gonde ashoon bi axaaxoo kambe yechemmone; bi axaaxee woderoonoo gaadeyemmone;

²³ oogeti tuushoochee tiyitona muriccemmone; bi qelloon quyo qayoochee tiyitona qitemmone.