Shaahiyoo 4 - Kafa Linguistics Project

Shalligoochee Daneebeeti Gaaco

¹ Ta bushiisheenaꞌote, ittoshi nihoochi ciicoon waayebote; shalligoon ittoshi danemmoyich manjiiree ellebote.

² Gaawe doyoon ittoshich dojjemmo taane; ta dojjaabeeti doyoon qajjaahote.

³ Ta nihoo kexooch batt dellidellaa ta beehooba, ta indeyichoo ikke mixxe bushoo ta beehooba,

⁴ ta nihoo ishichiꞌi taan dojjiye: “Ne mullo ta qaaroon yeshe; ta getoonoo quyebe; kashoona beeyemmo neene.

⁵ Shalligoonaa ariyoonon danebe; ta qaaroon batteyaahine; aroocheenoo bara wotteyaahine.

⁶ Shalligoon duppaahine; neen deggemmone; biin shune; neen quyemmone.

⁷ Shalligoo ooge mooyo bi tunetoyich shalligoon danebe. Neech beeto bullin bi qochiitaanona ariyoon ne hajjoo tuniibe.

⁸ Biin oogiibe; neen oogiyemmone; manjii yeshe; oogoon neech deebemmone.

⁹ Ne qellooch oogee gubbichoon kotiyemmone; gaawe qelli ukoonoo neech immemmone” iye.

¹⁰ Ta bushoocho, ta waan ellebe; ta yibbaatoonoo waayebe; meeti yemeenoon kashoona beeyemmo neene.

¹¹ Shalligee gommon neech dojjito taane; kaame gommonoo neen yaabito taane.

¹² Ne shaꞌaa beegaata, ne shaaddo keppheyaachemmone; ne woccaa beegaatoo tepheyaachemmo neene.

¹³ Neech ta dojjiton kashoona yeshe; gawukkiyaahine; gaawichi quyebe; ebi aroo neech kashoone.

¹⁴ Gondeenaꞌochi kaattoo waan wotteyaahine; boonoshi gommona hammaahine.

¹⁵ Aroochee wohe; aroonoo hammaahine; aroochee wotteree ne gommon yeshe.

¹⁶ Ebi asheenaꞌo, gondoon boonoshi shuuno qayigaata, tokketoo boonoshin daamaanoone; ashoon tephii boonoshi dichoo qayigaata, geepphiroo boonoshin yeshaanoone.

¹⁷ Axaaxee koshon maaheete; xuꞌee woyinee uyoonoo uchiyeete.

¹⁸ Cadiqeenaꞌochi gommo areddee aabo bekkemmi wottoon, daakkii daakkii hammiibeeti yaaꞌeexi bekkoommone.

¹⁹ Tunebaani gondeenaꞌochi gommo dunne manderoommone; amo boonoshin tephito gaata, ariyaaneenaꞌone.

²⁰ Ta bushoocho, ta yibbaatoon gaawichi ellebe; ta qaaro waanoo ne waamon gaꞌiibe.

²¹ Eboshin ne aafoochee wokkiyaahine; ne mulloochoo kotiibe.

²² Eboshi boonoshin danemmoyich kashoon, bi ashittino bullichoo diggoon immemminaꞌone.

²³ Kashee tunoo bi tunetoyich, bulli mooyoyee beshiiree ne mulloon quyebe.

²⁴ Xumme yibbaatoon ne waanee baye; kootee kootonoo ne waanee wokkiibe.

²⁵ Ne aafeenaꞌo kaachi ciineete; kaachiree aaf ciine.

²⁶ Ne baateenaꞌo kaame gommona shaaddebeete; ne gommo bulliyoo kaamemmone.

²⁷ Yoocha qanna gettaahine; ne baatoon gondoochee wochibe.