Shaahiyoo 31 - Kafa Linguistics Project

Taatoyich Ciicceti Ciico

¹ Bi indee biin dojjiti Masee taatoo Lemuꞌeelichi qaaro:

² “Ta bushoocho, ta shiyetocho, ta mookkee bushoocho,

³ ne giidoon maacheenaꞌoyich immaahine; ne gommonoo taateenaꞌon aalliitinaꞌoyich tuniyaahine.

⁴ “Lemuꞌeelo, woyinee uyoon uyo taateenaꞌoyich qaawiyaanoone; ebi taateenaꞌoyich qaawiyaanoone; mashiibeeti uyoon dakoo iraasheenaꞌoyich qaawiyaanoone;

⁵ uyiree sheeroon battemminaꞌone; xukketinaꞌoyich dayinnetoon bajjemminaꞌone.

⁶ Qitiya ii beetinaꞌoyich kashi uyoon imbote; bi kasho caammetoyich woyinee uyoon imbote.

⁷ Uyiree boonoshi giroon battebeete; boonoshi qaaqqoon shalligaayeete.

⁸ “Yibbaato hakkaaneenaꞌochi qoodoon yibbaatebe; boonoshin gaachemmon muccetinaꞌoyich neexebe.

⁹ Boonoshi qoodoon yibbaatebe; kaachi nallibe; girechonaa iritechonochi qoodooch neexebe” iyan.

Qoppechi Mechee Mooyo

¹⁰ Qoppechi mecheen koni danoon hakkehe? Aree ceelleinqoyee beshe oogeti aaxxeene.

¹¹ Bi keno biin oogichii gibenehe; bi kenoyich amolla shappaache.

¹² Aree bi yemeeno bulliich, bi kenoyich deꞌe mooyonani, gondoon tuniyaachane.

¹³ Bagee huushoonaa muttee tuppoonon qaawaꞌa, emiraabee bi kishoona shuunehan.

¹⁴ Aree giixechochi markaboommine; maayoon wohoochee deebahan.

¹⁵ Batt haraan beetaa tiyahan; bi kechi asheenaꞌoyich maayoon, bi gonneenaꞌoyichoo shuunoon, immahan.

¹⁶ Goyee budon ciinnaꞌa kemahan; shuunaa bi daneti gijjoonoo woyinoon bechiyan.

¹⁷ Bi shimetoonoo manjiyaa cuchahan; bi mochoonoo shuunoyich kupphiihan.

¹⁸ Bi giixo gaacecho bi tunoon ariihan; xumoona bi ceechoo tahaache.

¹⁹ Bi kishoona huuttoon yokkahan; bi yapheroonoo inziritoon guudiihan.

²⁰ Bi kishoon girechinaꞌoyich yaggiyan; iriteetoyichoo beddahan.

²¹ Bi kechi asheenaꞌo tagge tahoon boonoshi tahetoyich, aqqee goorooch boonoshich keqqaachan.

²² Bi qeenooch yaggeyemmi tahoon shuunahan; muttee tuppoochee ciciitaa yokkeeti, damere tahoon tahahan.

²³ Bi keno showee geeneenaꞌo daggooch, addibaabooch bi kotehooba aricheto tunehe.

²⁴ Muttee tuppoochee tahoon shippaꞌa kemmahan; giixechinaꞌoyichoo buroon giddiihan.

²⁵ Biyoo kuppheenaa oogechi asheenane; gubbi yemeenoochoo miiccemmine.

²⁶ Shalligoona yibbaatehan; shoodoona ashoon ciiccahan.

²⁷ Bi kechi asheenaꞌon gaawichaꞌa shiimahan; shuuna biishe tuneyaachan.

²⁸ Bi bushiisheenaꞌo tiyiree bi galletoon gettemminaꞌone; bi kenoo ishichi biin naademmone:

²⁹ “Gaawe mooyon tuniiti meeti genneenaꞌo beetinaꞌone; tunebaani ne, boonoshi bulliyee beshee neene” gettemmone.

³⁰ Malleto kootoone; damee shaawoo duuboone; tunebaani Doono Yeerin shattaabeeti maachee galleteetine.

³¹ Bi shuunee aafoon biich imbote; bi shuunoo addibaaboochaa biin galletebe.