Shaahiyoo 3 - Kafa Linguistics Project

Gurimaasheenaꞌoyich Icheti Ciico

¹ Ta bushoocho, ta dojjaa beeton batteyaahine; ta geteenaꞌon ne mullooch yeshe.

² Eboshiyoo kashee genjoonaa diggoonon neech immemminaꞌone.

³ Shunoonaa gibeneyoona neyee wokkaaye; eboshin ne qettooch tifebe; ne mullee cilloochoo kooribe.

⁴ Ebin ne tuniigaata, Doono Yeerinaa ashoonochi aafoochaa gidoonaa naadoonon danemmo neene.

⁵ Ne ceeni mulloona Doono Yeerin gibenebe; ne qelli gaboona degeyaahine.

⁶ Ne gommo bullina biin ariibe; biyoo ne gommon neech kaachemmone.

⁷ Mullechon tuniiree neen wochi ciinnaahine; Doono Yeerin shate; gondoocheenoo wohe.

⁸ Ebiyoo ne meenoyich wodoon, ne shaawushoyichoo kupphiyoon deebemmone.

⁹ Ne hajjitona, ne maayoocheenoo qaabbii shaggitona Doono Yeerin oogiibe.

¹⁰ Ebin ne tuniigaata, ne gotoo maayoona ceennemmone; ne woyinee goonooch woyinee uyo ceeni ufemmone.

¹¹ Ta bushoocho, Doono Yeerichi sheeroon hoxeyaahine; neen bi kaaree ciicciyooboo caammeyaahine.

¹² Nihoo bi shunniibeeti bushoon bi sheeroommon, Doono Yeeri bi shunnii beeton sheerii beetone.

¹³ Shalligoon daneti, goommii deꞌonoo hajjiti asho diireetone.

¹⁴ Ebiyoo birewoyee beshoon shimon daniibeeto, xalle aachoyee beshe gaacoon immiibeeto bi tunetoyichiye.

¹⁵ Shalligoo ceelle inqoyee beshe aaxxoone; ne qaataabeeti mooyo bulliichee biinna tatemmo aalloone.

¹⁶ Bi qanne kishooch eeni genjo beetone; bi yooche kishooch gaannoonaa oogoona beetone.

¹⁷ Bi gommo emiree gommone; bi kaattoo bulliich diggoo beetone.

¹⁸ Biin yechitinaꞌoyich kashoon immaabeeti mixiyoommone; biin tugetinaꞌo bulli diireyemminaꞌone.

¹⁹ Doono Yeeri bi shalligoona showoon halliye; bi gaboonoo shimaayeenaꞌon boonoshi xaaꞌooch manjiihe.

²⁰ Bi ariyoona aacinaꞌo ufeheete; qubeenaꞌoo amiyon dichiyeete.

²¹ Ta bushoocho, gaawe shalligoonaa gaawe gaboonon kupphii yeshe; eboshi ne aafoochee wokkaayeete.

²² Eboshiyoo neech kashoon immemminaꞌone; qetteexi aachoonoo tunemminaꞌone.

²³ Aroochee ne gommon diggoona hammemmo neene; ne baatoo tepheyaachemmone.

²⁴ Ne tokketaa beegaata, shataachemmo neene; shaawi tokketoon tokketemmo neene.

²⁵ Diqqoona waabeeti naxoyich, woyee gondeenaꞌo toommooch shaggiibeeti aalloyich shattaahine.

²⁶ Doono Yeeri ne gibeno tuneree shaachoona yechoochee ne baatoon quyemmone.

²⁷ Neech bi hakkee beetaa, tuniiya ne bedoyich gaawe mooyon tuniyoon qajjaahine.

²⁸ Ne immemmo beetaa, ne giyoon “Hami wobe; yaach neech immemmo taane” gettaahine.

²⁹ Neen gibeneꞌi ne gaꞌooch koteti ne giyoo toommooch gondoon shuuneyaahine.

³⁰ Amoonolla neen hallaani ashoona ikke naboo aalloon kaareyaahine.

³¹ Xuꞌechi ashoona qanaateyaahine; bi gommo aabinona dabbiyaahine.

³² Doono Yeeri xumme ashoon ciigehe; tunebaani kaame ashoyich bi maaci mooyon gaxxii gettiye.

³³ Doono Yeerichi ufo gonde ashi kexoochiye; tunebaani cadiqoochi kexon diiriye.

³⁴ Coonechinaꞌon coonemmone; tunebaani boonoshi qelloon giishii beetinaꞌoyich wojjoon immemmone.

³⁵ Mullechinaꞌo oogoon danemminaꞌone; tunebaani mullaalleenaꞌo cooneyemminaꞌone.