Shaahiyoo 29 - Kafa Linguistics Project

¹ Meeti aaboon getaa giyaani gajjechi asho, diqqoona tiishemmone; wodoonoo hakkaachemmone.

² Cadiqeenaꞌo ukkirehooba maccoo emiriye; tunebaani gonde asheenaꞌo ukkirehooba maccoo gaashilliye.

³ Shalligoon shunniibeeto, bi nihoon emirikkiye; tunebaani yahechin dabbiibeeto, bi gijjoon shacciye.

⁴ Dayinnetoona qeejjoona taatoo showoon tooꞌiihe; tunebaani xuccoon shunniibeeto showoon aalliihe.

⁵ Bi giyoyich noonoon shaawiibeeto, bi baatooch shaachoon shaachiye.

⁶ Gonde ashoon bi axaaxoo kambe yechemmone; tunebaani cadiqo shoddebee emiremmone.

⁷ Cadiqo girechochi dayinnetoyich aaxxiihe; tunebaani gonde asho ebin aaxxiyaache.

⁸ Cooqqirechinaꞌo katemoon dulliiheete; tunebaani mullechinaꞌo dulloon aqqiiheete.

⁹ Mullechi asho tuushoona tookkii bi taggegaata, tuushoo kaare cooqqiremmone; diggoo daneyaachemmone.

¹⁰ Damee ukkechinaꞌo xalle ashoon shixxiyeete; kaame ashi kashoon kichoyichoo qaawiyeete.

¹¹ Tuushoo bi kaaroon xalla bekkiihe; tunebaani mullecho bi maacooch yechiye.

¹² Iraashoo koote mooyon elleebeeto bi tunegaata, bi naayinaꞌo bulli gondeenaꞌo tunemminaꞌone.

¹³ Girechonaa biin xuqqii beetonon ikkochiibeeti mooyo, Doono Yeeri boonoshi gutticholla aafee bekkoon imone.

¹⁴ Girechoyich kaachii nalliibeeti taatoo, bi taatee qeeno bulli yemeenoon manjiree beeyemmone.

¹⁵ Kaaree sheeroo mullechon tuniihe; tunebaani sheereyaani bushoo bi indeen yeelliihe.

¹⁶ Gonde asheenaꞌo iraashehooba axaaxoo woddehe; tunebaani cadiqeenaꞌo boonoshi dihoon beeggemminaꞌone.

¹⁷ Ne bushoon sheeribe; neen tooꞌiyemmone; ne mulloonoo emirikkemmone.

¹⁸ Yaaꞌoo aallegaata maccoo gawukkoo tunemmone; tunebaani sheeroon quyeebeeto diireetone.

¹⁹ Maddecho, kaaroona baach kaamoon hakkaache; ne gettaabeeto biich giyitaanona wotteyaache.

²⁰ Bi yibbaatoona afaafineebeeti ashoon beeggaa beetine? Biyee tuushoyich gibeno beete.

²¹ Bi maddechon bi bushittinoochee tiijjii yaanii dichiibeeto, gubbich bi toommooch doonjiniye bi beeto.

²² Sheenechi asho kaaroon booddiye; ippechoo wodde axaaxoon shuunehe.

²³ Ashoon bi geecoo giishiihe; tunebaani bi qelloon giishiibeeto, oogoon danemmone.

²⁴ Gaayoona tookkii guuphiibeeto, bi kashoon shixxitone; maxxaaroon waayaabee cikkii qajjiye.

²⁵ Ashoon shato shaachooch yechoone; tunebaani Doono Yeerin gibeneebeeto, diggoona beeyemmone.

²⁶ Meeti asheenaꞌo ukkiroona xiboon qaawiyeete; tunebaani asho dayinnetoon bi danemmo Doono Yeer waaneeniye.

²⁷ Gonde asheenaꞌo cadiqeenaꞌona ciigeetinaꞌone; kaameenaꞌoo gonde asheenaꞌona ciigeetinaꞌone.