Shaahiyoo 28 - Kafa Linguistics Project

¹ Gonde asho, koniyoona biin yoohaanoon wocciye; tunebaani cadiqo daaheroochoommon keqqaalloon beehe.

² Showoo hukkoo shuunegaata, ukkiroo biich meettiye; tunebaani ariyechonaa gabechona tuneti ashoona kupphe taatee showoo tune yagemmone.

³ Girechon duꞌiibeeti ukkiroo, maayoon aalliibeeti amichi dudoommone.

⁴ Sheeroon qajjiibeeti asheenaꞌo gondeenaꞌon naadiyeete; tunebaani sheeroon quyee beetinaꞌo gondeenaꞌon shixxiyeete.

⁵ Gonde asheenaꞌo dayinnetoon shalligaacheete; tunebaani Doono Yeerich goyinnee beetinaꞌo gaawichiꞌi shalligiyeete.

⁶ Bi gommo xummoo tuneti gaannechoyee, bi gommo xalloo tuneti girecho beshiye.

⁷ Sheeroon quyeebeeto, mullechi bushoone; tunebaani gaacaalleenaꞌona guupheebeeto, bi nihoon yeelliihe.

⁸ Koyitiyoonaa bogona gaannoon kiciibeeti asho, bi kiciibeeto, girechinaꞌoyich ariqqee beetoyichiye.

⁹ Sheeroon waayoochee bi waamon badd wochiibeeto bi corooto ciigeetone.

¹⁰ Kaameenaꞌon gonde gommooch yaabiibeeto, bi iijjiti oppooch dihemmone; tunebaani xalleenaꞌo gaawe mooyon woraashemminaꞌone.

¹¹ Gaannechi asho bi qelloon mullecho tuniiꞌi ciinniye; tunebaani gabechi girecho ebi bi qocoon xalla kichiye.

¹² Cadiqeenaꞌo wudoon danehooba oogeti emiroo tunehe; tunebaani gondeenaꞌo ukkirehooba asho aashehe.

¹³ Bi axaaxoon aachiibeeto aafeyaachemmone; tunebaani bi axaaxoon aanniꞌi, axaaxee shuunoon qajjiibeeto maareyemmone.

¹⁴ Bulli aaboon Doono Yeerin shattiibeeto diireetone; tunebaani mulli manjoo iritee toommooch dihemmone.

¹⁵ Girechinaꞌon hajjiibeeti maaci manje ukkiroo, gigeebeeti daaheroommo, woyee capphi yecha ii beeti diiboommone.

¹⁶ Gabaalli iraashoo xuꞌechi maaci manjoone; tunebaani tateyaani gommona gaacoon danoon shixxii beetochi eeno genjemmone.

¹⁷ Ashi damee hiishechi asho bi qitimmi wottoon yallyallimi beeyemmone; koniyoona biin gaachaaye.

¹⁸ Bi shaaddo kaamoo tuneti asho wodemmone; tunebaani xumme gommecho diqqoona dihemmone.

¹⁹ Bi showoon gochiibeeto koshon michemmone; tunebaani gaacaalli mooyon dabbiibeeto oogichi giremmone.

²⁰ Gibeneeti asho oogichi diireyemmone; tunebaani gaannecho tunoyich wotwotiibeeto, sheeroochee muricaachemmone.

²¹ Ashi aafoon ciinniꞌi heppoo, tato toonoone; tunebaani ikkikke asho ikke tiishee koshoyicha iꞌi, gondoon shuunee beetone.

²² Hiriggecho gaanneya afaafinehe; giroo biin yechemmo bi tunoon ariyaache.

²³ Maanjii beetoyee, ashoon kaaree ciicciibeeto gubbich gaawe aafoona ciichemmone.

²⁴ Bi indeechon woyee bi nihoochon boggiichii, “Ebi axaaxoo toonoone” ii beeto, aalliyechochi guuphone.

²⁵ Hiriggechi asho kaaroon booddiye; tunebaani Doono Yeerin gibeneebeeto gaannemmone.

²⁶ Bi qelloon gibeneebeeti asho mullaalloone; tunebaani shalligoona shaaddeebeeto wodemmone.

²⁷ Girechoyich immiibeeto mucceyaachemmone; tunebaani bi aafoon badd wochiibeeto, uppeyemmone.

²⁸ Gondeenaꞌo ukkirehooba asheenaꞌo aasheheete; tunebaani ukkirittinoochee boonoshi kindiyooba cadiqeenaꞌo meettiyeete.