Shaahiyoo 27 - Kafa Linguistics Project

¹ Deco amoon bi deebemmo gaata ariyaano ne tunetoyich, yaach tunemmi mooyona yebeneyaahine.

² Baroo neen galleteballi ne wochi neen galleteyaahine; bare asho neen galleteballi ne noonoo neen galletaaye.

³ Xaqqo maggoone; qacoo shaagoone; tunebaani tuushe asho deebiibeeti iritoo boonoshi guttiyee beshe maggoone.

⁴ Kaaro maaci manjoone; ippoo ambamboommone; tunebaani qanaatee aafooch neexoon hakkemmo konine?

⁵ Xalla kichii kaaro, aacheeti shunoyee gaawiye.

⁶ Shixecho wochii wochii shumoyee, shunechochi mayiyoo gibeneehe.

⁷ Michiti ashich eeyo shaawaache; tunebaani shaaceti ashich caame mooyolla shaawiye.

⁸ Bi kexon gawukkii hammiibeeti asho, bi kexon gawukkaꞌa yallyallimaabeeti kafeyoommone.

⁹ Shittoonaa ixaanoona mulloon emirikkoommon, shunechi ashi ciico kashoon emirikkiye.

¹⁰ Ne shunechonaa ne nihoochi shunechonon qajjaahine; ne iritee aabooba ne manoo kexooch giyaahine. Wohooch beeti manoyee, katinooch beeti giyoo gaawiye.

¹¹ Ta bushoocho, taan naaggii beetoyich wochoon ta hakkemmoyich, mullechon tunebe; ta mulloonoo emirikkibe.

¹² Mullecho hayibo womon beeggiꞌi aashehe; tunebaani tuushoo arooch giyiꞌi xuuxoon beeggiye.

¹³ Bi ariyaani ashich buushaaretochi tahoon deꞌe; dallaawe ashoyich bi yechiiti yechiyoon ne waan kotiibe.

¹⁴ Haree yaaꞌooch tiyii cookee qaaroona bi giyoon diiriibeeto, uppitooch haddeehe.

¹⁵ Amiyooba cottii kuxaani cotoonaa, noonechi maacheena ikkeenaꞌone.

¹⁶ Yongoon yechii neechoo, zayitoon qanne kishoona usho, hakkeyoo bi qayoommon, areen cikkiyoo hakkeyaani mooyone.

¹⁷ Xuuroon xuuroo gayiriye; ebiyoommon wotta, ashoon asho kaachiye.

¹⁸ Balaasee mixin shiimemmo, bi aafoon maayemmone; bi doonon quyemmo oogemmone.

¹⁹ Aaco heeraawoochoommon ashi aafoon bi bekkiyoommon, ashi mullo, asho koni bi gaata bekkiihe.

²⁰ Siꞌooloonaa aallee xaaꞌoona miyi qayoommon, ashi qaatoo ebiyoommone.

²¹ Aachoonaa birewoonon qaaqqoo haattiye; ashoon biin galleteebeeti ashi noonoo haattiye.

²² Tuushe ashoon, bottoochaa maayoon bottoommon, bottee bushoona ne bottetaanona, bi tuushoo biin gawukkaache.

²³ Ne bageenaꞌon gaawichi ciine; ne gijjeenaꞌonoo manjii quyebe.

²⁴ Gaanno bulli yemeenoon beetaachemmone; gubbichoo shiijjeroo bulliich manjiree beetaachemmone.

²⁵ Shuuꞌi mocoo gacceechaa, gare mocoo collee bekkehooba, guudi toommoochee mocoo kiceehooba,

²⁶ ne bagee bushiisheenaꞌochi huushoochee tahoon danemmo neene; emmisheenaꞌon kemiree showoon kememmo neene.

²⁷ Neennaa ne kechi asheenaꞌonoyich, ne gonneenaꞌoyichoo maayo tunemmi, wodde emmishee ejjo danemmone.