Shaahiyoo 26 - Kafa Linguistics Project

¹ Baderoo qaawooba, amiyo maayi qecooba, doyaano bi tunoommon, oogo mullaalli ashoona doyaache.

² Yoobbii okk hach capheebeeti kafeenaꞌochoommon, naboo aalloon uppeebeeti ufo ashoon yeshaache.

³ Hareshoyich arengoo, kuroyich lugaamoo qaawiyoommon, mullaalloochi gubboyich gumbo qaawiihe.

⁴ Biin ne shaahaachemmoyich, mullaalloyich bi tuushittinoommona wochiyaahine!

⁵ “Mullecho taane” geti bi gabaachemmoyich, mullaalloyich bi tuushittinoommona wochibe!

⁶ Mullaallo kishoona wochoon daachiyoo, bi hajjee baatoon kuxoommo, hukkoonoo bi toommooch deeboommone.

⁷ Mullaallo shaahiyoona bi yibbaato, hekkelleebeeti sheqqe ashi baatoommone.

⁸ Mullaalloyich oogoon imo, xeppellooch xaqqoon qulloommone.

⁹ Mullaallo shaahiyoona bi yibbaato, mashecho bi kishooch giyiti angixon kichiya bi qiiccoommone.

¹⁰ Gommo beshin woyee mullaalloon shuuniibeeto, danemmo bullin mayiibeeti maꞌechoommone.

¹¹ Wochii wochii tuushiibeeti mullaalli asho, bi cooyon nappheya wotteebeeti kunaanoommone.

¹² “Mullecho taane” iꞌi gabiibeeti ashoon beeggaa beetine? Biyee tuushoyich beshe gibeno beete.

¹³ Yeexere asho “Daaheroo gommooch beetone! Gamini kaattooch daaheroo beetone” iye.

¹⁴ Shaaqqoo bi shullee toommoochaa bi guudoommon, yeexeroo bi qeechi toommoochaa guuddiye.

¹⁵ Yeexere asho shaatoochee dukkehe; tunebaani bi dukketon qappho biich maggoone.

¹⁶ Kaachiꞌi wochiibeeti shabaatte asheenaꞌoyee, beshe mullechon tuniiꞌi yeexeroo biin ciinniye.

¹⁷ Biin gedaanoon ashi kaaree daggooch giyiibeeti asho, gommon besheebeeti kunaanee waamon yechiibeeti ashoommone.

¹⁸ Ashoon wuxiibeeti, cobbcobbimii aaxxeebeeti shangoon awureebeeti geyechonaa

¹⁹ bi giyoon dawushiichii, “Kaachaane ta ito” ii beeti ashoona, ikkeenaꞌone.

²⁰ Mixo ciiregaata, qaaqqoo tahiye; tippecho aallegaata kaaro aqqehe.

²¹ Cicino qaaqqee gechoon, mixo qaaqqee aaxxoon woddiyoommon, moochecho kaaroon dulliihe.

²² Tippechochi yibbaatoo shaawi maayoommone; maaci ashittinooch beddaahaa giyiye.

²³ Gonde mooyo bi mullooch beetaa, noonoon shaawiibeeti asho, birewoona nasheeti nuuqqee qiicoommone.

²⁴ Shixecho gonde gaboon bi mullooch yechiichii, noonee shaawona yibbaatehe.

²⁵ Shabaatte eeꞌe mooyo bi mullooch bi beetoyich, noonee shaawona bi yibbaatetaanona biin gibeneyaahine.

²⁶ Shixecho bi tunoon maroona oppeebeeto, bi gondo iitoo aafoochaa xalla bekkemmone.

²⁷ Oppoon iijjiibeeto arooch dihemmone; xaqqoon gederikkiibeeto toommooch are xaqqo wottemmone.

²⁸ Koottiibeeti heciyoo bi mayiitinaꞌon shixxiye; maree yibbaatoo aalloon deebiye.