Shaahiyoo 25 - Kafa Linguistics Project

Solomooni Daakkiꞌi Gettiti Shaahiyeenaꞌo

¹ Eboshi wotta Yihudee taatoo Hiziqiyaasichi asheenaꞌo kooriti Solomoonichi shaahiyeenaꞌone:

² Mooyon aachoo Doono Yeerich oogoone; tunebaani mooyon boshee kichoo taatoyich oogoone.

³ Taatoochi mullo, shimaayoommi woho, waarwaare aachi dechi duchoommo, bi tunetoyich aricheyaache.

⁴ Birewoochee osheroon hidibe; gooshukkoo aroona qiicoon shuunemmone.

⁵ Taatoo aafoochee gondoon boyee beetinaꞌon wokkiibe; bi taatee qeeno cadiqoona manjemmone.

⁶ Taatoo aafoochaa bekkeya bekkeya gettaahine; ogoogeenaꞌochi xaaꞌoochoo neexeyaahine.

⁷ Iraashoo aafoochaa ne giishoyee, “Hach damba wobe” ne getteyoo gaawiye. Ne aafoona ne beeggeti mooyon,

⁸ afaafineree miixeya addibaabooch hammaahine. Ne miixetoyee gubb ne giyoo, neen kootiiꞌi bi miixegaata yeellemmo neene.

⁹ Ne mooyon ne giyoona tookkaa ne gajjiteyaa beegaata, ashi maaci mooyon kichiyaahine.

¹⁰ Ebin ne tuniigaata, ebin waayemmo neen gondiyemmone; ne shigoo shaaꞌi beeyemmone.

¹¹ Bi gooroona getteeti qaaro, birewee qiicee toommooch shuuneeti muume aachoommone.

¹² Mullechi ashi kaaro, deꞌa ii waayemmi ashich, waajji aachoommo, xalle aachoochee shuuneeti shashoommone.

¹³ Maayi qecci gooroobee gaamooba qaaye aaco ashoon emirikkoommon, gibeneeti wocheyecho biin wocheton emirikkiye; bi doonochi kashoon emirikkiye.

¹⁴ Bi imaachemmi wojjoon yebeneebeeto, amichaalli quboonaa yongoonoommone.

¹⁵ Haaꞌiyoona ukkiroon eehiyoo hakkeehe; maanjee yibbaatoo shaawushoon tiichiye.

¹⁶ Beshiree neen bi wuuqqittiyaachemmoyich, eeyon ne danehooba neech beddimmi wottoon baach mame!

¹⁷ Neen bi mataachemmonaa bi shixaachemmonoyich, ne giyoo kexooch wochi wochi hammaahine.

¹⁸ Bi giyoo toommooch kootoon miixeebeeto, qoolloommi, goraadoommi, aci shangoommi ashoone.

¹⁹ Gibeneyaane ashoon, iritee aabooba gibeno, shuuriti gashoon, woyee sheqqe baatoon gibenoommone.

²⁰ Bi mullo tiisheti ashich shoddee shoddo, aqqee aabooba tahee shootoommo, mayee toommooch kiikkeree ukkoommone.

²¹ Ne etto shaacegaata, koshon maanjibe; bi shachewegaata aacon uchibe!

²² Ebina bi toommooch qaaqqee bunoon shookkemmo neene; Doono Yeeriyoo gaawe gatiyoon neech qoccemmone.

²³ Dambi-waani yongo amiyon deebiye; oonnechi heciyoo asho ippemmoyich tuniihe.

²⁴ Noonechi mecheena tookkii ikke kexooch beemoyee, kechi toommeexi ikke gocooch beemo gaawiye.

²⁵ Shacheweti ashoon qaaye aaco digaayiyoommon, wohi showoochee waati mishiraachoo ashoon emirikkiye.

²⁶ Gonde ashich dihiibeeti cadiqe asho, qude aachi xuuphoommo woyee wooreti kote aacoommone.

²⁷ Wodde eeyon mamo gaaweyaache; ebiyoommon wotta oogee qaawoo oogiyaache.

²⁸ Bi kaaroon aqqiyoon hakkaani asho, bi uxeroo tiisheti katemoommone.