Shaahiyoo 24 - Kafa Linguistics Project

¹ Gonde asheenaꞌona qanaateyaahine; boonoshina nuuchittinoon qaatiyaahine.

² Boonoshi mullo gabiibeeto xuꞌooniye; boonoshi noonoo yibbaateebeeto ashoon duꞌiyooniye.

³ Kexo shalligoona hakkehe; manji bi beeyemmoyichoo gaboona shuuneehe.

⁴ Ariyoona, qiicee kexinaꞌo, aaxxi, gaawe gaanno bullina ceenniyeete.

⁵ Mullechi asho giidechone; ariyechi asho kupphee kupphee hammiye.

⁶ Ariyechochi yamoon deꞌona koyoon koyebe; meeti ciiccechinaꞌo beetooch wudoo beetone.

⁷ Shalligoo tuushoyich oogeti wohone; biyoo iitoochaa eciya tippoon tunehe.

⁸ Gondoon tuniiya gabiibeeto, marecho getaa ceekkemmone.

⁹ Mullaallo gabiibeeto axaaxooniye; cooqqirechonoo asheenaꞌo ciigeheete.

¹⁰ Iritee aabooba ne waateyegaata, hakkaallo neene getone.

¹¹ Qitooch gashee beetinaꞌon shiwebe; guureyooch xukkee beetinaꞌon wodiibe.

¹² “Ebin ta ariyaache” ne getigaata, mulloon haattiibeeto ebin shalligaachehe? Ne kashoon ciinniibeeti aroo ariyaachehe? Asho bullich bi shuuni shuunoommon qocaachehe?

¹³ Ta bushoocho, gaaweto bi tunetoyich eeyon mame; bi woolloo ne kookkooch shaawone.

¹⁴ Shalligoo ne kashoyich ebiyoommo bi tunoon ariibe. Shalligoon ne danegaata, gubbi ne beemo kaamemmone; ne gibenoo kuxeyaachemmone.

¹⁵ Gonde ashichoommon cadiqa ashi kexon ottaahine; bi beeyi xaaꞌoonoo xuqqaahine.

¹⁶ Cadiqe asho shabaatte wottoon dihiye; wochinnoonoo tiyiye; tunebaani gonde asheenaꞌo gondooch dihemminaꞌone.

¹⁷ Ne etto dihoona emiriyaahine; bi tepheyoonoo ne mullo oogichi emiraaye.

¹⁸ Doono Yeeri neenna ayiniree, bi kaaroon ne etto waanee wochemmone.

¹⁹ Gonde asheenaꞌochi naboona ippeyaahine; axaaxechinaꞌonoo qanaateyaahine.

²⁰ Gondeenaꞌoyich gubbich tunemmi gibeno aalloone; boonoshi ceechoo tahemmone.

²¹ Ta bushoocho, Doono Yeerinaa taatoonon shate; boonoshi toommooch hukkee beetinaꞌona bacceyaahine.

²² Ebi asheenaꞌo toommooch iritoo diqqoona woyemmone; ebi gutteenaꞌo waanee woyemmi aalloon koni ariihe?

Mullechi Asheenaꞌochi Bare Ciico

²³ Eboshi wotta mullechi asheenaꞌochi yibbaateenaꞌone: Ashi aafoon ciinniꞌi nalloo tato toonoone.

²⁴ Gonde ashoon “Ne xalloo neene” ii beeto, macceenaꞌona uppeyemmone; aagetoona shixxeyemmone;

²⁵ tunebaani gonde ashoon sheerii beetinaꞌoyich, emiroo tunemmone; gaawe diiroo boonoshi toommooch tunemmone.

²⁶ Tate wochoon wochoo, noonoon shumoommone.

²⁷ Maaxeexi ne shuunoon shuunebe; bulli mooyon budooch ne qellich qanniibe; aroyee gubb ne kexon hage.

²⁸ Ne giyoo toommooch naboo aalloon cikki miixeyaahine; ne noonoonoo dawushiyaahine.

²⁹ “Taach bi shuunetoommon biich shuunemmo taane; bi shuunoon biich qoccemmo taane” gettaahine.

³⁰ Ikke yeexere uroochi goyoona, gabaalli uroochi woyinee budona, beshehoye.

³¹ Ebiyoche, angixo arooch ceennitone; shuyoo showoon guuppitone; xaqqee uxeroo tiishetone.

³² Ebin ciinnaꞌa gabiyo; ebin beeggaꞌa ariyoon daneho.

³³ Giishechoon tokkete, giishechoon geepphiri, ne kishoon qodiree giishechoon kashe ne beetaa,

³⁴ illa, giroo bokkoochoommon, mucco goraadoon cuyeti ashichoommon, ne toommooch woyemmone.