Shaahiyoo 22 - Kafa Linguistics Project

¹ Gaawe shigo meeti gaannoyee gaawiye; gaawe aafoona ciicheyoo aachoonaa birewoonoyee beshiye.

² Girechonaa gaannechonon daniibeeti mooyo, boonoshi bullin hallito Doono Yeeri tunoone.

³ Mullechi asho hayibo womon beeggiꞌi bi qelloon aachiye; tunebaani tuushoo arooch hammii giyiꞌi xuuxehe.

⁴ Qellee giishiyoonaa Doono Yeerin shatona, gaannoon, oogoonaa kashoonon daniihe.

⁵ Xumme ashi gommooch angixonaa shaachoona beetone; tunebaani bi qelloon quyeebeeto aroochee wokkiye.

⁶ Bushoyich bi hammemmi boochoon dojjibe; bi geenehooboo aroochee ikaachemmone.

⁷ Gaannecho girechon hajjiye; eretteto erettiitoyich guunone.

⁸ Gondittinoon shookkiibeeto iritoon qeccemmone; bi kaaree gumbo dihemmone.

⁹ Bi maayoochee girechoyich bi qooditoyich, wojjechi asho diireyemmone.

¹⁰ Cooqqirechon kichi yoohe; hayo echemmone; kaaroonaa naagoonoo neexemmone.

¹¹ Mulli xalloo tunoon shunniibeeto, gaawe yibbaatechoo, taatoona shunecho tunemmone.

¹² Doono Yeerichi aafo ariyoon quyehe; tunebaani gibeneyaaneenaꞌochi qaaroon aalliihe.

¹³ Yeexere asho “Daaheroo maaxooch beetone; gommoochaa taan wuxemmone” iye.

¹⁴ Shunimaaye noonoo oppee hoonoommone; Doono Yeeri uppiti asho arooch dihemmone.

¹⁵ Bushiishoochi mullooch tuushoo caaceetone; tunebaani sheeree gumbo ebin boonoshi waanee wokkiihe.

¹⁶ Bi gaannooch daakkoyich girechon xuqqiibeeto, woyee gaannechoyich immiibeeto, giremmone.

Mullechi Asheenaꞌochi Ciico

¹⁷ Ne waamon kaachiree mullechochi yibbaatoon waayebe; ne mulloonoo ta doyoo waan wochibe.

¹⁸ Eboshi ne mullooch boonoshi danegaata, ne noonoochoo boonoshi beegaata, emiremmo neene.

¹⁹ Ne gibeno Doono Yeeri bi tunemmoyich, eboshin hanaach neech arichiiho.

^20-21 Kaamoonaa iberoona amo gaata neech arichiyoyich, neen wochetinaꞌoyich ibere mooyon ne deebemmoyich, ciicoonaa ariyoona beeti, shaashe mooyon neech kooraano taane?

²² Girecho bi tunetoyich girechon boggaahine; iritechon nallee gabberoochaa xuqqaahine.

²³ Ebiyoo Doono Yeeri boonoshi taggoon taggemmo bi tunetoyichiye; boonoshin boggii beetinaꞌochi kashoon boggemmone.

²⁴ Kaarechi ashoona xibeyaahine; ippechona tookkishoo hammaahine.

²⁵ Bi gommon ne doyigaata, ne aalla shaachooch giyemmo neene.

²⁶ Buushaaroo tunoyich kishoo tappeyaahine; hiishoyich ashoon buushaareyaahine.

²⁷ Ne qoccemmo aallegaata, ne qeyaabeeti qeeno beddaahaa tiijjaa hammemmone.

²⁸ Ne qaabbechinaꞌo xogiti, wonnee daaree malletoon waaxxaahine.

²⁹ Bi shuunoona qoppechi ashoon beeggetine? Aroo taateenaꞌo aafooch neexemmone; shigaalli asheenaꞌo aafooch neexeyaachemmone.