Shaahiyoo 21 - Kafa Linguistics Project

¹ Taatoochi mullo Doono Yeerichi kishoochiye; biyoo woce aacochoommon bi daaggito waan wochiye.

² Ashich bi gommo bulli kaamoo shaahii bekkehe; tunebaani Doono Yeeri mulloon maqqiye.

³ Kaamoonaa tatoona tuneti mooyon tuniyoo, deejjoon deejjoyee beshoon Doono Yeerin emirikkiye.

⁴ Aafee ciixonaa mullee geecoona gondeenaꞌochi ceecheenaꞌone; ebiyoo axaaxoone.

⁵ Gaawe yamoon yameꞌi shuuno, shimon danooch bechiye; tunebaani afaafineebeeto bulli girooch giyiye.

⁶ Kootaa daneebeeti gaanno, kaatee aalleebeeti hiinnoommo, wuxiibeeti shaachoommone.

⁷ Tate mooyon tuniyoon boonoshi qajjitoyich, gonde asheenaꞌon boonoshi xuꞌo hidi aalliyemmone.

⁸ Axaaxechochi gommo xummoone; tunebaani xalle asheenaꞌochi shuriyoo kaamoone.

⁹ Noonechi mecheena tookkii ikke kexooch beemoyee, kechi toommeexi ikke gocooch beemo gaawiye.

¹⁰ Gonde ashi mullo gondoon shunniye; biinoommi bi manoyichoo ariqqeyaache.

¹¹ Cooqirecho sheereegaata, tuushoo ariyechon tunehe; mullecho bi doyigaata, ariyoon daakkiye.

¹² Cadiqe Nuggishoo gondeenaꞌo kexon beeggii beetone; gondeenaꞌonoo aalliihe.

¹³ Girechochi cookoon waayeyaache ii beeto, bi cookaa, waayemmon muccemmone.

¹⁴ Aashoona icheti mooyo kaaroon aqqiihe; shoopphooch duuqqeeti xucco kupphe kaaroon aqqiihe.

¹⁵ Nalloo tachaa nallee gaata, cadiqo emiriye; tunebaani axaaxechinaꞌo keqqiyeete.

¹⁶ Shalligee gommoochee muriccimmi asho, qite asheenaꞌo kiceetooch tooqqemmone.

¹⁷ Bi qelloon emirikkoon shunniibeeto giremmone; woyinee uyoonaa zayitoonon shunnii beetoo, gaanneyaachemmone.

¹⁸ Gonde asho cadiqoochi keroon, dawushechoo kaamoochi keroon, xuuxemmone.

¹⁹ Noonechi, kaarechi mecheena tookkii beemoyee, barahooch beemo gaawiye.

²⁰ Aaxxe qiicoonaa aaxxe zayitoona mullecho kexoochiye; tunebaani mullaalli asho ebin shaccii aalliihe.

²¹ Cadiqoonaa deꞌittinoonon qaawiibeeti asho, kashoon, cadiqoonaa oogoonon danemmone.

²² Mullecho giidechinaꞌochi katemoon kochii yeshon hakkiye; boonoshi gibenaabeeti mishigoon tiishon hakkiye.

²³ Bi kookkoonaa bi heciyoonon quyeebeeto, iritoochee bi kashoon quyehe.

²⁴ Geecii cunnenneebeeti asho cooqqirecho getteehe; bi shuunoo bulli geecoo baachiye.

²⁵ Bi kishoo shuunoon bi qajjitoyich, yeexeroon qaatoo wuxemmone.

²⁶ Heeyo bullin qaatiye; tunebaani cadiqo immiichii wotteyaache.

²⁷ Gonde ashi deejjoo ciigeetone; gonde gaboona bi deejjiibeeto beshoon ciigeetone.

²⁸ Koote ashi miixoo deqqemmo daneyaache; tunebaani xiishii waayeebeeti ashi miixoo manjemmone.

²⁹ Gonde asho aafoon kupphehe; tunebaani kaame asho bi gommon manjii ciinniye.

³⁰ Asho bi shalligoona, bi gaboona, bi ariyoonoo, Doono Yeeri toommooch timon hakkaache.

³¹ Koyoobich hareshoo qanniye; tunebaani wudoon immiibeeto Doono Yeerine.