Shaahiyoo 20 - Kafa Linguistics Project

¹ Woyinee uyo ashoon cooqqirecho, kashi uyo yexecho tuniihe; eboshina muriccito bulli ariyecho toonoone.

² Taatoochi kaaro gigeebeeti daaheroommon shattiitone; biin ippiimmo bi kashee toommooch nallitone.

³ Kaaroochee woho ashoon oogiihe; tunebaani tuushe asho kaaroyich afaafinehe.

⁴ Yeexere asho gooroona goyaache; qecci goorooch, bi qeccemmon daneyaache.

⁵ Ashi mullee gaboo oppee ducheexi aacoommone; tunebaani gabechi asho kittii kichiye.

⁶ Meeti asheenaꞌo shoodechinaꞌo boonoshi tunoon yibbaateheete; tunebaani ebiyoommi gibeneeti ashoon koni danoon hakkehe?

⁷ Cadiqe asho oonneyaani beemon beehe; biyee gubbi bi bushiisheenaꞌoo diireetinaꞌone.

⁸ Nallee gabberooch koteti taatoo, gonde mooyo bullin bi aafoona ciinnii barbariihe.

⁹ “Ta mulloon xalliito taane; ta axaaxoochee xalleto taane” geton hakkemmo konine?

¹⁰ Baribare machoonaa baribare kobbaayonon, guttinona Doono Yeeri ciigehe.

¹¹ Gaggere busholla xalloonaa kaamoona bi tuno, bi tuniibeeti mooyona arichehe.

¹² Waayeebeeti waamonaa ciinniibeeti aafoonon boonoshi guttinona hallito, Doono Yeerine.

¹³ Ne gireyaachemmoyich tokketoon shunnaahine; ne aafoon gaxxibe; koshon michemmo neene.

¹⁴ Kemecho “Gondoone, gondoone” iibee qiicoon qalliihe; tunebaani kemee bi daammitoyee gubb worganehe.

¹⁵ Aachoonaa ceelle inqoona beetone; tunebaani ariyoona yibbaateebeeti noonoo eboshiyee beshoone.

¹⁶ Bi ariyaani ashich buushaaretochi tahoon deꞌe; dallaawe ashoyich bi yechiiti yechiyoon ne waan kotiibe.

¹⁷ Dawushoona daneti kosho ashich shaawone; tunebaani gubb bi kookkooch qaca qaca gettemmone.

¹⁸ Ciicoon deꞌona yamoon yamebe; ariyechochi ciicoon deꞌona koyoon koyebe.

¹⁹ Guuddii oonnechona aashee mooyo kechiye; ebich yibbaateechii wotteyaani ashi waanee wohe.

²⁰ Bi nihoon woyee bi indeen naaggiibeeto, bi ceechoo dunne manderoochaa tahemmone.

²¹ Batti batt afaafinoona daneti gaanno, ciiroochaa abbetaalloone.

²² “Gondee kaalloon wochemmo taane” gettaahine; Doono Yeerin quyebe; bi neen gaachemmone.

²³ Kishoo guttiiꞌi qeelloon Doono Yeeri ciigehe; koote qeellee qiico biin emirikkaache.

²⁴ Asho shaaddeebeeto Doono Yeeri itoochiye; ebi tunegaata, asho aabichishiye bi gommon shalligoon bi hakkemmo?

²⁵ Asho afaafinoona Doono Yeerich bi mookketoyee gubb, bi gaabbigaata, biich shaachoone.

²⁶ Shalligechi taatoo gondeenaꞌon barii ariihe; boonoshin ariqqaalloon sheeriye.

²⁷ Ashi ayaano Doono Yeerichi ceechoone; bi maaci mooyo bullin haattiye.

²⁸ Shoodoonaa gibeneyoona taatoon quyeheete; bi taatee qeenoo shoodoona manjiye.

²⁹ Gurimaasheenaꞌoyich boonoshi oogo giidoone; geeneenaꞌoyich boonoshi oogo bukkoone.

³⁰ Mayiiꞌi sheeroo gonde mooyon aalliihe; gumboona xoobo maaci ashittinoon xalliihe.