Shaahiyoo 2 - Kafa Linguistics Project

Shalligoochee Daneebeeti Gaaco

¹ Ta bushoocho, ta qaaroon waayebe; ta getoonoo ne mullooch kotiibe;

² ne waamo shalligee qaaroon bi ellemmoyich tuniibe; ne mulloonoo goomo waan wochibe;

³ ariyoon ceege; goommii deꞌo waanoo bunnebe.

⁴ Birewoon woyee aacheeti gijjoon qaawoommon ebin qaawibe.

⁵ Ebin ne tuniigaata, Doono Yeerin shato amo gaata ariyemmo neene; ne Nuggishoon ariyee gommon danemmo neene.

⁶ Shalligoon immiibeeto Doono Yeerine; ariyoonaa goommii deꞌona daneebeeto bi waaneeniye.

⁷ Biyoo kaameenaꞌoyich gaawe shalligoon immiye; oonneyaani beemon beetinaꞌon gaachoo qeroommon qerii wodiihe.

⁸ Dayinnetoona nallii beetinaꞌon quyee beetone; bi yaafeenaꞌochi shaaddoon manjii beetone.

⁹ Ebiyooba cadiqittinoonaa dayinnetoonon, kaamittinoonaa gaawe gommo bullinon shalligemmo neene.

¹⁰ Shalligoo ne mullooch giyemmone; ariyoo ne kashoon emirikkemmone.

¹¹ Gaawe gaboo neen wodiyemmone; goommii deꞌo neech deeboon tunemmone;

¹² gonde gommoochee, xumme yibbaatechi asheenaꞌo waaneenoo neen wodiyemmone.

¹³ Eboshi mandere boochoona hamoyich kaame gommon qajjii beetinaꞌo,

¹⁴ gonde shuunoona emirii beetinaꞌo, xummoo tunoona oogichii emirii beetinaꞌone;

¹⁵ boonoshi gommo wuuqqoo, boonoshi shaaddoo xummoone.

¹⁶ Shunimaayee waanee neen wodiyemmone; noonoo nooccaabeeti waaneenoo neen quyemmone.

¹⁷ Ebi ure bi bushittinee kenoon qajjeti, bi Nuggishoo aafooch bi giyeti wogoonoo battetine;

¹⁸ bi kexo qitoo waan desh gaꞌetone; bi boochoo qititinaꞌo waan shakkii beetone;

¹⁹ bi waan hammiibeeto bulli wotteyaachemmone; kashee gommonoo daneyaachemmone.

²⁰ Ebich ne, kaame asheenaꞌochi gommona hambe; cadiqeenaꞌochi gommonoo yeshe.

²¹ Kaame asheenaꞌo showee toommooch kotemminaꞌone; xalleenaꞌo arooch beeyemminaꞌone.

²² Tunebaani gonde asheenaꞌo showoochee aallemminaꞌone; gibeneyaaneenaꞌoo aroochee waaxemminaꞌone.