Shaahiyoo 19 - Kafa Linguistics Project

¹ Bi heciyoon guttiibeeti mullaalli ashoyee, oonneyaani beemon beeti girecho gaawiye.

² Ariyaalli shittecho tuno deꞌo toonoone; afaafinee shaaddeebeeti asho gommon muriccemmone.

³ Asho bi beemon tuushoona duubiichii, bi mulloona Doono Yeerin gondiihe.

⁴ Gaanno meeti shunechon deebiye; tunebaani girechochi shunecho biyee wokkiye.

⁵ Koote miixecho sheereyoo qayaachemmone; koote yibbaatechoo sheeroochee muricaachemmone.

⁶ Meetinaꞌo, wojjechi asheenaꞌona xiboon qaawiyeete; wojjoon immiibeeti ashich bulliyona xiboone.

⁷ Girechon bi maneenaꞌo bulli shixxiyeete; ishigaata, bi nuucheenaꞌo am shaahoon biyee wokkeheete! Boonoshin dabbii bi ceeggitaanolla, nuuchoon daneyaache.

⁸ Shalligoon danemmo bi kashoon shunniye; goommii deꞌon kupphii yechimmoyich mooyo kaamehe.

⁹ Kootoon miixeebeeto, sheereyoo echeyaachemmone; kootoon yibbaateebeeto aallemmone.

¹⁰ Gaannee ciqqinniꞌi beemo mullaalloyich tateyaache; guuno iraashoo toommooch doonjo beshe gondoone.

¹¹ Shalligoo ashoon haaꞌiyecho tuniihe; biin xuqqiton maaroo oogoon danoone.

¹² Taatoochi kaaro daaheree cidoommone; tunebaani bi aafoochaa gidoon dano, mocee toommeexi keetoommone.

¹³ Mullaalli bushoo bi nihoon aallooch bechiye; noonechi mechee shaanaani amichi kuchoommine.

¹⁴ Kexonaa gaannoona nihoo waanee woraasheehe; tunebaani qoppechi mecheen immiibeeto Doono Yeerine.

¹⁵ Yeexerittino magge tokketoon deebiye; yeexere ashoo shaacemmone.

¹⁶ Sheeroon quyeebeeto bi kashoon quyemmone; tunebaani Yeerichi qaaroon qallayiibeeto qitemmone.

¹⁷ Girechoyich immiibeeto, Doono Yeerich erettiihe; Doono Yeeri bi shuunee gaacoon biich gaaccemmone.

¹⁸ Wottee gibeno beetaa, ne bushoon sheeribe; bi qitemmoyich tuniyaahine.

¹⁹ Ippechi asho bi shuunee gatiyoon qoccemmone; biin gaachaa ne wodiigaata, wochinnoon ebin tuniyoo neech echeyaache.

²⁰ Ciicoon ellebe; getoon waayebe; gubbich shalligoon danemmo neene.

²¹ Ashi mullooch beeto meeti gaboone; tunebaani ceennemmo Doono Yeeri gettitone.

²² Ashi waanee qaaweebeeto gibeneyoone; koote asho tunoyee girecho tuno gaawiye.

²³ Doono Yeerin shato kasho waan yaabiye; biin shattiibeeto digaayoona beehe; gonde mooyo bi waan shagaache.

²⁴ Yeexere asho shaatoochee dukkehe; tunebaani bi dukketon qappho biich mawoone.

²⁵ Cooqirechon yexe; tuushoo mullechon tunemmone; mullechon ne kaaraa ciicigaata beshoon ariyecho tunemmone.

²⁶ Bi nihoon duꞌiibeeti, bi indeenoo kexoochee yookkiibeeto, yeellii cooniibeeti bushoone.

²⁷ Ta bushoocho, ciicoon waayo ne qayigaata, ariyee qaaroochee muriccemmo neene.

²⁸ Xumme miixoo dayinnetee toommooch cooqqiriye; gondoon shuuno gondeenaꞌoyich shaawiye.

²⁹ Cooqqirechinaꞌo toommooch nalloo, yeexereenaꞌo gubboyichoo quddoo, qannitone.