Shaahiyoo 18 - Kafa Linguistics Project

¹ Ashoona yesheyaani asho, bi qaatoon baach dabbiye; asho bullina shucheti qociyoon shixxiye.

² Tuushoo bi mulleexon geton qaawiyalli, goommii deꞌona emiraache.

³ Gondoon shuuno hoxeyoon deebiye; oogoon mucco giishoon deebiye.

⁴ Ashi noonoochee kechiibeeti shalligee qaaro, ooge aacoommo, qulliqullii ufeebeeti aachi xuuphoommone.

⁵ Gonde ashi waan gaꞌo, cadiqoochi nalloonoo xummiyo, tato toonoone.

⁶ Tuushe ashi yibbaatoo kaaroon deebiye; bi noonoo gumboon ataalliye.

⁷ Tuushe ashoon bi yibbaatoo aalliihe; bi noonoo bi kashoyich shaachoone.

⁸ Tippechochi yibbaatoo shaawi maayoommone; maaci ashittinooch beddaahaa giyiye.

⁹ Shuunoo shuunoon taahiibeeti asho, aalliyechochi manoone.

¹⁰ Doono Yeerichi shigo manje xaqqee dilaaloommone; cadiqeenaꞌo arooch woccii deebeꞌi wodiyeete.

¹¹ Gaannechoyich bi gaanno mishigechi katemoon, genje xaqqee uxerooniye bi shaahiibeeto.

¹² Asho bi dihoyee shiichiꞌi bi mulloona geeciye; tunebaani qellee giishiyoo oogoyee shiichoone.

¹³ Waayeyaano beechii wochoo, tuusha haddiibeeti, yeelliiti mooyone.

¹⁴ Kashoona beeya qaatoo, asho bi biiyehooba bi goggemmoyich tuniihe; tunebaani kashoona beeyi qaatoo aallegaata, koniyoona goggeyaache.

¹⁵ Beelloochi mullo ariyoon hajjiye; mullechochi waamoo ariyoon qaawiye.

¹⁶ Wojjoo, immechoyich gommon qechiye; ogoogeenaꞌo aafoochoo katichiye.

¹⁷ Bi shixecho waaꞌi echemmi wottoon, shiichiꞌi taggoon waayiito deꞌooniye bi shaahiibeeto.

¹⁸ Ixoo kuxo kaaroon neechiye; kupphe taggechinaꞌochi mooyon kuxxiye.

¹⁹ Xukketi manoo mishigechi katemoommi kupphoone; boonoshi kaaro xaqqee uxeree tuggoommone.

²⁰ Asho, bi noonoochee kechiibeeti mooyona digaayemmone; bi yibbaatoonoo michemmone.

²¹ Qitoonaa wodoona heciyee kishoochiye; yibbaatoon shunniibeeto, bi yibbaatee aafoon maayemmone.

²² Mecheen daneto gaawe mooyon danete, Doono Yeer waanee gidoon danete, getone.

²³ Girecho maanjiibee yibbaatehe; tunebaani gaannecho noggoona wochiye.

²⁴ Nuuchoon meechii beeti asho aallemmone; tunebaani manoyee beshe katini shunecho beetone.