Shaahiyoo 17 - Kafa Linguistics Project

¹ Kaaro beeti kexoochaa gifiroon mamoyee, diggoo beetoochaa dapphe koshon mamo gaawiye.

² Qocaalli bushoon, mullechi guuno hajjemmone; manaamaneenaꞌona tookkishoo iristoon qoodeyemmone.

³ Aachoonaa birewoonon qaaqqoo haattiye; Doono Yeeri ashi mulloon haattiye.

⁴ Gonde asho xuꞌechochi noonoochee ellehe; koote ashoo marechochi heciyoochee waayehe.

⁵ Girechon cooneebeeto biin Halliton naaggiye; ashi iriteyoona emiriibeeto, sheeroochee muricaachemmone.

⁶ Geeneenaꞌoyich, bushaa bushiisheenaꞌo gubbichoomminaꞌone; bushiisheenaꞌoyichoo boonoshi niheenaꞌo oogee yiireenaꞌone.

⁷ Gaawe yibbaatoo tuushoona doyaache; ebiyoommon wotta, koote yibbaatoo iraashoo waanee quyeyaache.

⁸ Ikkikke asheenaꞌoyich xucco kaayoon kaayiyoommone; boonoshi hammimmo bulliichaa mooyo boonoshich kaamehe.

⁹ Xuqqiton maariibeeti asho shunoon qaawiye; tunebaani wochii wochii qoonniibeeto, bi shunechon muccehe.

¹⁰ Balle wottoon yexaa tuushoyich bi gimoyee beshoon, ikke wottoon kaaree ciicaa mullechoyich giyiye.

¹¹ Gonde asho hukkoon baach qaawiye; ebich mulli manje wocheyecho bi waan wocheyemmone.

¹² Tuushe ashoon bi tuushee kaamoona danoyee, bi bushoo bokketi diibeena dano gaawiye.

¹³ Deꞌee kaalloon gondoon wochiibeeto kexoochee, gonde mooyo bulli aaboon kuxeyaachemmone.

¹⁴ Kaaro bi tiyiibeeto aaco bi gabbetoochee ufoommoniye; ebich kaaro tiyaan beetaa hayoon neechibe.

¹⁵ Gonde ashoon xallii beetonaa cadiqoon gondii beetona, guttiyona Doono Yeeri aafoochaa ciigeetinaꞌone.

¹⁶ Tuushe asho mullaallo bi tunetoyich, shalligoon danoyich gijjoon bi qoccitaa, amo halleshe?

¹⁷ Shunecho bi shunechon amee aaboobolla shunniye; manoo bi shiijjeebeeto iritee aaboobichiye.

¹⁸ Mullaalli asho kishoo tappeꞌi, bi giyoyich buushaarittino giyiye.

¹⁹ Axaaxoon shunniibeeto kaaroon shunniye; bi kelloon genjiibeeto aalloon qaawiye.

²⁰ Xumme mullechi ashich mooyo kaameyaache; bi heciyoon shaddiibeeto gondooch dihiye.

²¹ Mullaalli bushoochi naboona bi nihoo ayiniye; tuushe bushoochi nihoyich emiroo aalloone.

²² Emiriti mullo gaawe attoone; tunebaani ayiniti kasho shaawushoon wuxiye.

²³ Gonde asho dayinnetoon dabiyoyich, aashoona xucco maahe.

²⁴ Mullechi asho bi aafoon shalligoo waan wochiye; tunebaani mullaalloochi aafo showee tuggooch beddaahaa qaawilliye.

²⁵ Mullaalli bushoo bi nihoon ayinooch geddiye; biin shiyetiyoo caammeyemmoyich tuniihe.

²⁶ Cadiqe ashoon gijjoon qochiyoona sheeroo tato toonoone; deꞌe asheenaꞌon xoobo gaaweto toonoone.

²⁷ Yibbaatoon woddiyaani asho ariyechone; magge shuriyechi asho gabechone.

²⁸ Tuushoo bi cikkigaata, mullechooch haddeehe; bi noonoon bi yeshonoo beelloo getteehe.