Shaahiyoo 16 - Kafa Linguistics Project

¹ Asho ikke mooyon bi mulloona gabiye; tunebaani are gaboo bi ceennemmo Doono Yeerinane.

² Ashich bi gommo bulli xalloo shaahii bekkehe; tunebaani Doono Yeeri mulloon maqqiye.

³ Ne shuunoon Doono Yeerich beshii imbe; ne gaboo ceennemmone.

⁴ Doono Yeeri halliti mooyo bulli nabechone; biyoo gondeenaꞌon aallee aaboyich qanniitone.

⁵ Geecii beetinaꞌo bullin Doono Yeeri ciigehe; iberoochaa boonoshin sheeraanoon qayaachemmone.

⁶ Shunoonaa gibenoona axaaxoo qereehe; Doono Yeerin shatona asho axaaxoochee wokkiye.

⁷ Asho bi shaaddoona Doono Yeerin emirikkiibeeto bi tunegaata, bi etteenaꞌo diggoona biinna tookki boonoshi beeyemmoyich tuniihe.

⁸ Dayinnetoon dabiyoona daneebeeti wodde gaannoyee, tate gommona daneebeeti giishecho beshiye.

⁹ Asho bi mulloona bi gommon gabiye; tunebaani bi gommon kaachemmo Doono Yeerine.

¹⁰ Doono Yeerichi nalloo taatoochi noonooch beetone; ebich bi noonoo nalloochaa muricaache.

¹¹ Tate machoonaa qeellee qiicoona Doono Yeerichone; mollexxeexi qeellee qiiceenaꞌo bulli bi shuuneenaꞌone.

¹² Gonde mooyon shuuno taateenaꞌo waanaa ciigeetone; ebiyoo taatee qeeno manjiibeeto, cadiqoona bi tunetoyichiye.

¹³ Cadiqe ashi yibbaatoo taateenaꞌon emirikkiye; iberoon yibbaatee beetonoo shunniyeete.

¹⁴ Taatoochi kaaro qitee wochee bushoommone; tunebaani mullechi asho ebi kaaroon aqqiihe.

¹⁵ Taatoochi aafee birooch kasho beetone; biinna shuchoo naawoobee amiyon deebiibeeti quboommone.

¹⁶ Aachoon danoyee shalligoon dano beshiye; birewoon danoyee goommii deꞌon dano gaawiye.

¹⁷ Kaameenaꞌochi boocho gondoochee wokkitone; tachii shaaddeebeeto bi kashoon wodiihe.

¹⁸ Geecoo aallooch bechiye; bi qelloon yeephoo dihooch yaabiye.

¹⁹ Geecechinaꞌona tookkii kecoon qoodeyoyee, girechinaꞌona tookkii qelloon giishiiꞌi beemo gaawiye.

²⁰ Ciicoon deqqii beetoyich mooyo kaamehe; Doono Yeerin gibeneebeeto diireetone.

²¹ Mullechi asho shalligecho getteyemmone; shaawi yibbaatoo ariyoon daakkiye.

²² Shalligoo, hajjitoyich kashee tunoone; tunebaani tuusheenaꞌo boonoshi tuushoona sheereeheete.

²³ Mullechochi mullo, bi noonoon quyehe; bi noonoochoo ariyoon daakkiye.

²⁴ Shaawi yibbaatoo, kookkooch noocciibeeti, ashittinoonoo wodiibeeti, eechi woolloommone.

²⁵ Ashich kaamoo shaahiibeeti boocho beete; tunebaani ciiroochaa qitooch daammii beetone.

²⁶ Shaacoo, shuunechon kupphe bi shuunemmoyich tuniihe; bi qettoo, bi shuunemmoyich biin shuurikkiye.

²⁷ Gaacaalli asho ashich gondoon gabiye; bi yibbaatoo qaaqqee aaxxoochoommon michii beetone.

²⁸ Xumme asho, ashoonaa ashoonon kaariihe; tippecho shunechonaa shunechonon kuxxiye.

²⁹ Xuꞌechi asho bi giyoon dawushiye; gonde gommoochoo daammiye.

³⁰ Aafoona xayishiibeeto, xumme gaboon gabiye; bi noonoon shaacciibeeto gonde mooyon tuniihe.

³¹ Bukkoo oogee gubbichoone; bi daneebeeto, cadiqo tunoonane.

³² Ginee anaamoyee haaꞌiyechi asho gaawiye; katemoon kochii yechitoyee bi qelloon hajjito beshiye.

³³ Ixoo kuchee beetone; tunebaani mooyon kuxxiibeeto Doono Yeerine.