Shaahiyoo 15 - Kafa Linguistics Project

¹ Maanjoona wochoo kaaroon aqqiihe; tunebaani kupphe qaaro kaaroon booddiye.

² Mullechochi heciyoo ariyoo shunneyemmoyich tuniihe; tunebaani mullaalloochi noonoochee tuushoo kechiye.

³ Doono Yeeri aafo bulli xaaꞌoon ciinnii beetone; deꞌeenaꞌonaa gondeenaꞌonon beeggii beetone.

⁴ Wodiyechi heciyoo kashoon daniihe; tunebaani xumme heciyoo qiimittoon wuxiye.

⁵ Mullaalli bushoo bi nihoochi ciicoon hoxehe; tunebaani sheeroon deqqiibeeto accechone.

⁶ Cadiqeenaꞌo kexooch wodde gaanno ceennitone; tunebaani gondeenaꞌo daneebeeti gijjoo boonoshich xuuxoon deebemmone.

⁷ Mullecho ariyoon gamichiye; tunebaani mullaallo ebiyoommon tuniyaache.

⁸ Gondeenaꞌochi deejjoo Doono Yeeri aafoochaa ciigeetone; tunebaani kaameenaꞌochi corooto biin emirikkiye.

⁹ Gonde ashi gommo Doono Yeeri aafoochaa ciigeetone; tunebaani cadiqee gommona hammii beeton shunniye.

¹⁰ Kaame gommoochee kechimmo oogeton sheereyemmone; sheeroon shixxii beetoo qitemmone.

¹¹ Siꞌooloonaa aallee xaaꞌoona Doono Yeeri aafooch bekkeebeeto bi tunegaata, ashi bushiisheenaꞌo mullo am shaahoon bekkehe!

¹² Cooqqirechi asho sheereyoon shunaache; mullechinaꞌo waanoo hamaache.

¹³ Mullee emiroo aafoon biriihe; tunebaani mullee ayinoo qiimittoon wuxiye.

¹⁴ Gabechi ashi mullo ariyoon qaawiye; tunebaani mullaalleenaꞌochi noonoo tuushittinoon cokkehe.

¹⁵ Neexaa hajjeetoyich yemeeno bulli maggoone; tunebaani emiriibeeti mulloyich beemo bulli aabee gifiroommone.

¹⁶ Dulloo beeteexi wodde gaannoyee, Doono Yeerin shato beeteexi giisheche mooyo gaawiye.

¹⁷ Kaaro beetoochaa awuyi meenon mamoyee, shunoo beetoochaa shaanon mamo gaawiye.

¹⁸ Ippechi asho kaaroon booddiye; tunebaani haaꞌiyechi asho kaaroon aqqiihe.

¹⁹ Yeexere ashi gommo angixona uxereetone; tunebaani kaameenaꞌochi gommo naqqoone.

²⁰ Mullechi bushoo bi nihoon emirikkiye; tunebaani mullaalli bushoo bi indeen qallayiye.

²¹ Mullaalli asho bi tuushoona emiriye; tunebaani gabechi asho tate mooyon tuniihe.

²² Boyo aallegaata, gabeeti gaboo ceenaache; tunebaani boyecho meetigaata ceenniye.

²³ Tatoona wocheeti wochoo ashoon emirikkiye; qaaweeti goorooch getteeti qaaro am shaahe gaawetone!

²⁴ Mullecho kashee gommo waan kaama hammiye; desh maash daammiibeeti gommo waan hamaache.

²⁵ Doono Yeeri geecechinaꞌo kexon happemmone; tunebaani xuumeechi daaroon quyemmone.

²⁶ Gondeenaꞌochi gaboo Doono Yeer waanaa ciigeetone; tunebaani gaawe yibbaatoo biin emirikkiye.

²⁷ Tateyaani gommona gaacoon danoyich hiriggiibeeto, bi kechi ashoon xuuxooch geddiye; tunebaani xuccoon shixxiibeeto, kashoona beeyemmone.

²⁸ Cadiqe asho bi wochoyee shiichiꞌi gabiye; tunebaani gonde ashi noonoochee gonde mooyo aaco ufoommon ufehe.

²⁹ Doono Yeeri gonde asheenaꞌo waanee wohone; tunebaani cadiqeenaꞌochi qolloon waayehe.

³⁰ Bire aafo mulloon emirikkiye; mishiraachoo shaawushoon kupphiihe.

³¹ Kashoon immiibeeti kaaroon deꞌa ii waayemmo, mullechinaꞌona tookki beeyemmone.

³² Sheeroon shixxiibeeto bi qelloon giishiihe; tunebaani sheeroon deqqiibeeto shalligoon danehe.

³³ Doono Yeerin shato, shalligoon doyoone; qelloon giishiyoo, oogoyee shiichoone.