Shaahiyoo 14 - Kafa Linguistics Project

¹ Mullechi maachee bi kexon haggahan; tunebaani mullaalle bi hajjee kishoona happiyan.

² Bi shaaddo kaamoo tuneti asho, Doono Yeerin shattiye; tunebaani xumme gommecho Doono Yeerin hoxehe.

³ Tuushe ashoon bi yibbaatoo gumboona mutiihe; tunebaani mullechinaꞌon boonoshi yibbaatoo quyehe.

⁴ Gattoo aalli xaaꞌooch maayo aalloone; tunebaani meeti maayo daneebeeto gattee giidoonane.

⁵ Gibeneeti miixoo kootaache; tunebaani koote miixoo kootoon kaaphehe.

⁶ Cooqirecho shalligoon qaawiyalli daneyaache; tunebaani gabechoyich ariyoon dano womaache.

⁷ Bi waanee ne ariyemmi mooyo aallo bi tunetoyich, mullaalli ashi waanee wohe.

⁸ Ariyechochi shalligoo, bi gommon bi muricaachemmoyich tuniihe; tunebaani tuushoon mullee mucco muriciihe.

⁹ Yeexeroo axaaxoona cooqqiriye; tunebaani kaameenaꞌo daggooch deꞌittino beetone.

¹⁰ Ashi ayinoonaa emiroona bi aricheebeeto, biich baachiye; bare asho koniyoona tookkii qoodeyoon hakkaache.

¹¹ Gonde ashi kexo dihemmone; tunebaani kaame ashi kexo manjemmone.

¹² Ashich kaamoo shaahiibeeti boocho beete; tunebaani ciiroochaa qitooch bechii beetone.

¹³ Miiccii beegaatoona mullo ayinoon hakkiye; emiroo eefona tacceyoon hakkiye.

¹⁴ Cadiqittinoochee shokiibeeti asho bi shuunee gatiyoon danemmone; deꞌe ashoo bi deꞌe shuunee gatiyoon danemmone.

¹⁵ Tuushoo, bulli mooyon iberii deqqiye; tunebaani accecho bi shaaddoon ciinniye.

¹⁶ Mullechi asho shattiye; gondoocheenoo wottehe; tunebaani mullaallo amoonolla aaxxiyaani afaafinechone.

¹⁷ Kaatee kaareebeeti asho, tuushe ashi shuunoon shuunehe; tunebaani ariyecho haaꞌiihe.

¹⁸ Mullaalleenaꞌo tuushoon woraashiyeete; tunebaani ariyechinaꞌo, ariyoon gubbichoochoommon ukeheete.

¹⁹ Gondeenaꞌo deꞌeenaꞌo aafooch, axaaxechinaꞌoo cadiqeenaꞌo kellooch, goyinneheete.

²⁰ Girecho bi giyoonolla shichetone; tunebaani gaannechoyich meeti shunecho beetone.

²¹ Bi giyoon hoxeebeeto axaaxechone; tunebaani girechoyich ariqqeebeeto diireetone.

²² Gondoon gabii beetinaꞌo muriccii beetinaꞌone; tunebaani deꞌoon gabii beetinaꞌo, shoodoonaa gibeneyoonon daneheete.

²³ Aayo bulliich gaacoo beetone; tunebaani koteechii woroo girooch geddiye.

²⁴ Mullechinaꞌoyich gubbichoo, boonoshi gaannoone; tunebaani tuusheenaꞌo boonoshi tuushoona aricheheete.

²⁵ Ibere miixoo kashoon woddiihe; tunebaani koote miixoo beshii immiye.

²⁶ Doono Yeerin shattii beetoyich kupphe gibeno beetone; bi bushiishoyichoo deebo beetone.

²⁷ Doono Yeerin shato kashee tunoone; asho qitee shaachoochee bi muriccemmoyich tuniihe.

²⁸ Taatoyich oogo, bi qeejjiibeeti maccee meetone; tunebaani maccoo aallegaata, taatoo aallehe.

²⁹ Haaꞌiyecho goommii deqqiibeeti ashoone; tunebaani kaarecho bi tuushoon bekkiihe.

³⁰ Mullee diggo ashittinoyich iiwittinoon immiye; tunebaani qanaato shaawushoon maabeeti biiyoommone.

³¹ Girechon xuuxiibeeto biin Halliton hoxehe; tunebaani girechoyich ariqqeebeeto biin Halliton oogiihe.

³² Gondeenaꞌo boonoshi gonde shuunoona dihiyeete; tunebaani cadiqeenaꞌo boonoshi gibeneyoona deeboon daneheete.

³³ Shalligoo gabechi ashi mullooch kotehe; tunebaani mullaalleenaꞌochi mullooch aricheyaanoone.

³⁴ Cadiqoo maccoon kaama kaama oogiihe; tunebaani axaaxoo maccoon cooniihe.

³⁵ Mullechi maddechon taatoo shunniye; tunebaani yeelliibeeti maddechon taatoo kaarehe.