Shaahiyoo 13 - Kafa Linguistics Project

¹ Mullechi bushoo bi nihoochi ciicoon waayehe; tunebaani cooqqirecho sheeroon waayeyaache.

² Asho bi noonoochee kechiibeeti yibbaatoona, gaawe mooyon danemmone; tunebaani dawushechinaꞌo xuꞌoon qaatiyeete.

³ Bi noonoon quyemmo bi kashoon quyemmone; bi noonoon gawukkimmo aallemmone.

⁴ Yeexeroo oogichii bi qaatitaa, amoonolla daneyaache; tunebaani kupphee shuuneebeeto michiye.

⁵ Cadiqe asho kooton shixxiye; tunebaani gonde ashi yibbaatoo yeellii cooniihe.

⁶ Bi gommo kaamoo tuneti ashoon cadiqittino quyehe; tunebaani axaaxechon bi axaaxoo dichiye.

⁷ Gaannecho shaahi bekkeya ii beeto beete; tunebaani amolla biich aalloone; baroo wotta girechon shaahiibeeto beete; tunebaani wodde gaannechone.

⁸ Gaannecho bi gijjoona bi kashoon biishehe; tunebaani girecho, amoyichona aaxxiyaache.

⁹ Cadiqeenaꞌochi bekko gaawichii bekkehe; tunebaani gondeenaꞌochi ceechoo tahiye.

¹⁰ Geecoo yexooch bechiye; tunebaani ciicoon deqqii beetinaꞌo mullechinaꞌone.

¹¹ Woddii aayaanoon daneti gijjoo kaate aallemmone; tunebaani giishii giishii kiceeti gijjoo woddemmone.

¹² Gibeneeti mooyo yagigaata mullo ayiniye; tunebaani qaatoo ceenigaata, kashoon emirikkiye.

¹³ Ciicoon qallayiibeeto, bi toommooch iritoon deebiye; tunebaani getoon oogiibeeto wojjoon danemmone.

¹⁴ Mullechinaꞌo dojjiibeeti doyoo kashee tunoone; asho qitee shaachoochee bi muriccemmoyich tuniihe.

¹⁵ Ariyecho tuno ashoon gaawe aafoona ciichiihe; tunebaani dawushechinaꞌochi gommo aallooch bechiye.

¹⁶ Mullechi asheenaꞌo boonoshi ariyoona shuuneheete; tunebaani mullaalleenaꞌo boonoshi tuushoon bekkiiheete.

¹⁷ Gibeneyaani wocheyecho iritoon deebiye; tunebaani gibeneeti wocheyecho wodoon deebiye.

¹⁸ Kaaree ciicon shixxii beetinaꞌo toommooch giroonaa yeelloona shaggiye; tunebaani sheeroon deqqiibeeto oogehe.

¹⁹ Qaatoo ceenigaata, kasho emiriye; tunebaani mullaalleenaꞌo gondoochee wottoon ciigeheete.

²⁰ Mullechinaꞌona tookkii shaꞌeebeeto, mullechon tunehe; tunebaani mullaalleenaꞌona nuucheebeeto, gonde iritooch dihiye.

²¹ Duꞌo axaaxechinaꞌon dabbiye; tunebaani cadiqeenaꞌo gaawe gatiyoon daneheete.

²² Deꞌe asho bi bushaa bushoyich bi gaannoon woraashiihe; tunebaani axaaxechinaꞌochi gaannoon woraashemminaꞌo cadiqeenaꞌone.

²³ Girechochi goyo wodde maayoon shakkiihe; tunebaani dayinnetee dabiyoochee tiyitona aallehe.

²⁴ Bi bushoon sheeraano bi bushoon shixxii beetone; tunebaani bi bushoon shunniibeeto, kupphiiꞌi sheeriye.

²⁵ Cadiqo bi qettee wottoon maahe; tunebaani gonde asho shaacaa beehe.